ރައީސް އިބްރާހިމް މުހައްމަދު ސޯލިހް އުއްތަމަ ފަނޑިޔާރުކަމަށް، މާފަންނު ގުލްފާމްގެ އަހްމަދު މުއުތަސިމް އަދުނާން އަދި ސުޕްރީމް ކޯޓުގެ ފަނޑިޔާރުކަމަށް، އައްޑޫ ސިޓީ މީދޫ، ހަސަންކާރިގެ ހުސްނުއްސުއޫދު މިއަދު އައްޔަން ކުރައްވައިފިއެވެ.
މި 2 ބޭފުޅުން މަގާމުތަކަށް އައްޔަންކުރެއްވުމުގެ ރަސްމިއްޔާތު ބާއްވަވާފައި ވަނީ މިއަދު މެންދުރުފަހު ރައީސް އޮފީހުގައެވެ.
ރައީސް ސޯލިހް އުއްތަމަ ފަނޑިޔާރުކަމަށް، މުއުތަސިމް ހަމަޖެއްސެވީ ގާނޫނުއަސާސީގެ 147 ވަނަ މާއްދާގެ ދަށުންނެވެ. މުއުތަސިމް ވަނީ 2010 އިން 2014 އަށް ސްޕްރީމް ކޯޓުގެ ފަނޑިޔާރެއްގެ ގޮތުގައި މަސައްކަތްކުރައްވާފައެވެ. އޭނާ ވަނީ އިނގިރޭސި ވިލާތުގެ ގްލަސްގޯ ޔުނިވަރސިޓީން ޓްރާންސް ނޭޝަނަލް ކޮމާޝަލް ލޯއިން މާސްޓާސް އޮފް ފިލޯސަފީ ހާސިލު ކުރައްވާފައެވެ. އަދި އިނގިރޭސި ވިލާތުގެ ބަކިންހަމް ޔުނިވާސިޓީން، ބެޗްރަލާ އޮފް ލޯ، ވޭސް އޭނާ ހާސިލުކުރެއްވިއެވެ.
މިއަދު ބޭއްވި ރަސްމިއްޔާތުގައި މުއުތަސިމަށް މަގާމުގެ ހުވައި ލައިދެއްވީ ސުޕްރީމް ކޯޓުގެ ފަނޑިޔާރު ހުސްނުއްސުއޫދެވެ.
ސުޕްރީމް ކޯޓުގެ ފަނޑިޔާރުކަމަށް، މިއަދު ހަމަޖެއްސެވި ހުސްނުއްދުއޫދު އެ މަގާމަށް ހަމަޖެއްސެވީ ގާނޫނުއަސާސީގެ 148 ވަނަ މާއްދާގެ (ހ) ގެ ދަށުންނެވެ. ސުއޫދު ވަނީ އޮސްޓްރޭލިޔާގެ ކްއީންސްލޭންޑް ޔުނިވާސިޓީން މާސްޓާސް އޮފް ލޯ ހާސިލުކުރައްވާފައެވެ. އަދި އޭނާ ވަނީ މެލޭޝިޔާގެ އިންޓަނޭޝަނަލް އިސްލާމިކް ޔުނިވަސިޓީން ބެޗްލާ އޮފް ލޯގެ އޮނާސް ޑިގްރީއެއް ވެސް ހާސިލުކުރައްވާފައެވެ. ސުއޫދު އެންމެފަހުން ހުންނެވީ، މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަހުގީގުކުރާ ކޮމިޝަނުގެ ޗެއާމަންގެ މަގާމުގައެވެ. އެ މަގާމުން އޭނާ އިސްތިއުފާ ދެއްވީ މިއަދެވެ.
މިއަދު ބޭއްވި ރަސްމިއްޔާތުގައި ސުޕްރީމް ކޯޓުގެ ފަނޑިޔާރުކަމަށް، އައްޔަންކުރެއްވި ހުސްނުއްސުއޫދަށް މަގާމުގެ ހުވައި ލައިދެއްވީ ސުޕްރީމް ކޯޓުގެ ފަނޑިޔާރު ޑޮކްޓަރ އަޒްމިރާލްޑާ ޒާހިރެވެ.
