ހުޅުމާލޭގައި ރޭ ތޫނު އެއްޗަކުން ހަމަލާދީ މަރާލި ގާސިމް ހަސަންގެ ޖަނާޒާ ބާއްވައިފި އެވެ.
ގާސިމްގެ މަރުން އެތައް ބަޔަކަށް ވަނީ ކުއްލި ސިހުމެއް ލިބިފަ އެވެ. އަދި ވަކިން ހާއްސަކޮށް ގާސިމްއާއި މަރާއެކު އޭނާއާއެކު، މަސައްކަތްކުރި އެކުވެރިންނާއި އާއިލާއަށް، ކުރިމަތިލާންޖެހުނީ ބޮޑު ހިތާމައަކާއެވެ.
ގާސިމްގެ ޖާނާޒާ ބާއްވާފައިވަނީ މިއަދު މެންދުރު ނަމާދަށްފަހު، މާލޭ މަސްޖިދުއް ތަޢާވުން އާސަހަރާ މިސްކިތުގަ އެވެ. މިޖަނާޒާގައި ގިނަ އަދަދެއްގެ މީހުންވަނީ ބައިވެރިވެފަ އެވެ. ގާސިމް މަރުވިއިރު އޭނާގެ ހުރީ 4 ފިރިހެން ކުދިންނާއި އަންހެން ކުއްޖެކެވެ.
އުމުރުން 59 އަހަރުގެ ގާސިމްއަށް ރޭގެ ވަގުތެއްގައި ހަމަލާ ދީފައިވަނީ ގްރޫޕު ހަދާފައި ދިޔަ ބަޔަކު ކަމަށް ވެއެވެ. އޭނާއަށް ހަމަލާ ދީފައިވަނީ ސީދާ އޭނާގެ ކަރަށް ކަމަށް މަންޒަރު ދުށް ބައެއް މީހުން ބުނެ އެވެ. ޒަހަމްތަކަކާއެކު ގާސިމް އޮތީ ހުޅުމާލޭ ރިތިގަސް މަގުގަ އެވެ. އަދި އޭނާ ހޮސްޕިޓަލަށް ގެންދިޔަ އިރުވެސް ވަނީ މަރުވެފައެވެ.
ފުލުހުން ބުނީ ހުޅުމާލެގައި އެ ހާދިސާ ހިނގައިގެން ރިޕޯޓު ލިބުމާއެކު އޭނާ ހޮސްޕިޓަލަށް ގެންދެވުނީ 9 ގެ ފަހުން ކަމަށާއި، ނިޔާވި ކަމަށް ހޮސްޕިޓަލުން މައުލޫމާތު ދީފައި ވަނީ 9.50 ހާއިރު ކަމަށެވެ. ގާސިމްއަކީ 5656 ގެ ޓެކްސީ ޑްރައިވަރަކަށެވެ. ސޯޝަލް މީޑިއާގައި ވާހަކަ ދެކެވެމުން އައި ގޮތުގައި ޓެކްސީ ޑްރައިވަރު ރަހުމް ކުޑަ ގޮތަކަށް މަރާލާފައިވަނީ، ފައިސާގެ މައްސަލައާއި ގުޅިގެން ކަމަށެވެ. ނަމަވެސް ސޯޝަލް މީޑިއާގައި ފެތުރެމުންދާ އެ ވާހަކަތަކަކީ ދޮގު ވާހަކަތަކެއްކަމަށް ގާސިމްގެ އެކުވެރިންވަނީ ބުނެފަ އެވެ.
ގާސިމްގެ ރަށްޓެއްސެއް ކަމަށްވާ އިސްމާއިލް ޝަރީފް "ދަޕްރެސް"އާ ވާހަކަ ދައްކަމުން ބުނީ ސޯޝަލް މީޑިއާގައި ރައްޔިތުންގެ މަޖިލީހުގެ މެންބަރެއްގެ އަތުން ގާސިމް ފައިސާތަކެއް ނަގާފައިވާ ކަމަށް ބުނެ ވާހަކަަތައް ދައްކަމުން އަންނަ ކަމަށެވެ. އަދި ގާސިމަކީ އިރެއްގައި އަބަދު ޓެކްސީއެއް ކުރަމުން ދިޔަ މީހެއް ކަމަށްވީ ނަމަވެސް މިއަދު އޭނާ ޓެކްސީ ކުރަނީ މަދުން ކަމަށްވެސް ޝަރީފް ބުންޏެވެ.
ހެންވޭރު ކޭމާޓް ހޮޓަލުން އަބަދުވެސް ދިމާވެ ގާސިމްގެ އަމިއްލަ ދިރިއުޅުމުގެ ގިނަ ކަންކަން އެނގޭ ޝަރީފް ބުނީ ހަވީރު ގާސިމްއާ އެކުގައި ސައި ބޮއިގެން ނިކުތް އިރު ހުދު ޝަރީފަށްވެސް އެއީ ގާސިމްއާ ބައްދަލުވާނެ އެންމެ ފަހު ފަހަރު ކަަމެއް ނޭނގެއެވެ.
"ވަރަށް ރަނގަޅު މީހެއް އެއީ. އަޅުގަނޑަށް އެނގެނީ އަޅުގަނޑާއި އޭނަ ދައްކާ ވާހަކަަތައް. އަޅުގަނޑަށް ވަރަށް ގިނަ އެއްޗެހި ކިޔާ ދޭނެ. އަޅުގަނޑުވެސް ދެކުނިން ފޭސްބުކުން ތި ބުނާ ވާހަކައެއް. އަޅުގަނޑު ދަންނަ ގާސިމަކީ ދަރަންޏެއް އޮންނަ މީހެއް ނޫން. މަރާލުމާއި ހަމައަށް ﷲ ގެ ރަހުމަތުން ގާސިމަކީ ވަރަށް ފުދިގެން އުޅޭ މީހެއް. މިހާރު ވަރަށް ޓެކްސީ ނުކުރާނެ، އުޅެނީ ވެހިކަލްގެ ސްޕެއާ ޕާޓްސް ކަހަލަ އެއްޗެހި ވިއްކަން"ޝަރީފް
ޒަމާންވީ ގާތް ރަހުމަތްތެރިޔާގެ ކުއްލި މަރާއި އެކު ޝޮކެއް ލިބި އަދިވެސް އެ ހާދިސާ ގަބޫލުކުރަން ދަތިވެފައި ހުރި ޝަރީފު ބުނީ އޭނާއަށް ބަޔަކު އިންޒާރެއް ދިން ވާހަކައެއް ދުވަހަކުވެސް ބުނެފައި ނުވާ ކަމަށެވެ. އޭނާ ހުޅުލެއަށް ދަތުރު ނަގަން ދިއުމުގެ ކުރިންވެސް ކޭމާޓު ހޮޓަލުން ބައްދަލުވި ކަމަށާއި އެވަގުތުވެސް ވާހަކަ ދެއްކީ ވަރަށް ހިނިއައިސް ސަކަރާތް ޖަހާފައި ކަމަށް ގާސިމް އެކުވެރި ޝަރީފު ބުންޏެވެ.
"ނޫން އަޅުގަނޑު މިއީ ވަރަށް އެއްކޮށް އޭނާއާ އެކުގައި އުޅޭ މީހެއް. ކޮންމެ ދުވަހަކު އެތައް ފަހަރަކު ބައްދަލުވާނެ. ދުވަހަކުވެސް އަޅުގަނޑު ގާތުގައި ތިކަހަލަ ވާހަކައެއް ނުދައްކާ. އެކަމަކު އަޅުގަނޑަށް އެނގޭ ގާސިމަކީ މީހުންނާ މައްސަލަ ޖެހި މީހުންނަށް ލަނޑު ދީގެން އުޅޭ މީހެއް ނޫން،"ޝަރީފް
މި ހާދިސާއާ ގުޅިގެން ޕޮލިސް ކޮމިޝަނަރު މުހައްމަދު ހަމީދު ކުރެއްވި ޓްވީޓެއްގައި ވިދާޅުވީ މިކަން ކުރި މީހުން ހޯދަން ފުލުހުންގެ ސީރިއަސް ކްރައިމް ޑިޕާޓްމަންޓުން މަސައްކަތް ފަށާފައިވާ ކަމަށާއި ހުޅުމާލެ އަށް ދަތުރުކުރާ ވެހިކަލްތަކާއި މީހުން ފާސްކުރަމުން ދާނެ ކަމަށެވެ. އަދި މި އަމަލު ހިންގި ބަޔަކު ހޯދޭނެ އެއްވެސް މައުލޫމާތެއް އެނގޭ މީހަކު ހުރި ނަމަ ފުލުހުންނާ މައުލޫމާތު ހިއްސާކުރުމަށް ވެސް ސީޕީ ހަމީދު ވަނީ އިލްތިމާސް ކުރައްވާފައެވެ.
