ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލްއަޒީޒް އާލް-ސައުދުގެ ބޭބޭފުޅު، އަވަހާރަވުމާ ގުޅިގެން ރައީސް އިބްރާހިމް މުހައްމަދު ސޯލިހް ތައުޒިޔާ ފޮނުއްވައިފިއެވެ.
ސައުދީ ރަސްގެފާނު ސަލްމާން ބިން އަބްދުލްއަޒީޒް އާލް-ސައުދުގެ ބޭބޭފުޅަކީ ހިޒް ހައިނެސް ޕްރިންސް ބަންދަރު ބިން އަބްދުލްއަޒީޒް އާލް-ސައުދެވެ.
ސައުދީ ރަސްގެފާނަށް ރައީސް ސޯލިހް ފޮނުއްވި ތައުޒިޔާގެ މެސެޖުގައި، ސައުދި އަރަބިއްޔާގެ ޕްރިންސް ބަންދަރު އަވަހާރަވުމާ ގުޅިގެން ސައުދީ ޝާހީ އާއިލާއަށް ކުރިމަތިވި ހިތާމައިގެ މި ދަނޑިވަޅުގައި، ދިވެހި ސަރުކާރާއި، ރައްޔިތުންނާއި އަދި އެމަނިކުފާނުގެ އަމިއްލަ ނަންފުޅުގައި، ސައުދީ ޝާހީ އާއިލާއަށާއި، އެގައުމުގެ ރައްޔިތުންނަށް ވަރަށް އިހްލާސްތެރިކަމާއެކު ހަމްދަރުދީ ފޮނުއްވާފައިވެއެވެ.
ރައީސް ސޯލިހްގެ މެސެޖުގައި، ޕްރިންސް ބަންދަރަކީ، ސައުދީ އަރަބިއްޔާއަށް އެތައް ގޮތަކުން ގިނަގުނަ ހިދުމަތްތަކެއް ކުރައްވާފައިވާ ބޭފުޅެއްކަން ފާހަގަ ކުރައްވާފައިވެއެވެ. އަދި ޕްރިންސް ބަންދަރު އަވަހާރަވުމާއި ގުޅިގެން ސައުދީ ޝާހީ އާއިލާއަށް ކުރިމަތިވި މި ހިތާމަވެރި ދަނޑިވަޅުގައި އެ އާއިލާއަށް ކެތްތެރިކަން ދެއްވުމަށް އެދިވަޑައިގެން ދުއާކުރައްވާފައިވެއެވެ.
