ސުޕްރީމް ކޯޓުގެ ފަނޑިޔާރު ކަމަށް ކުރީގެ ފަނޑިޔާރު އަހުމަދު މުއުތަސިމް އަދުނާނާއި ކުރީގެ ބަންޑާރަ ނައިބު ހުސްނުއްސުއޫދުގެ ނަން، ދިރާސާ ކުރުމަށް ރައްޔިތުންގެ މަޖިލީހުގެ ޖުޑިޝަރީ ކޮމެޓީއަށް ފޮނުއްވައިފިއެވެ.
ރައީސް ރޭ ކުރެއްވި ޓްވީޓެއްގައި ވިދާޅުވީ އުއްތަމަ ފަނޑިޔާރުކަމަށް މުއުތަސިމް އަދުނާން އަދި ސުޕްރީމް ކޯޓުގެ ފަނޑިޔާރު ކަމަށް ހުސްނުއްސުއޫދު އައްޔަންކުރުމަށް، އެ ދެ ބޭފުޅުންގެ ނަން ރައްޔިތުންގެ މަޖިލީހުގެ ރުހުން ހޯދުމަށް ފޮނުވާފައިވާ ކަމަށެވެ.
މި ދެ ބޭފުޅުންގެ ނަން ރައީސް ސޯލިހު ޖޭއެސްސީއަށް ފޮނުވީ މިދިޔަ ހަފުތާގެ ތެރޭގައެވެ. ދެ ބޭފުޅުންގެ ނަން މަޖިލީހަށް ފޮނުއްވީ އުއްތަމަ ފަނޑިޔާރަކަށް މުއުތަސިމް އަދި ފަނޑިޔާރުންނަށް ސުއޫދާއި ހައި ކޯޓުގެ ފަނޑިޔާރު އަދި ޖޭއެސްސީގެ މެމްބަރު އަބްދުއްރައޫފް އިބްރާހީމް އައްޔަން ކުރެއްވުމާ މެދު ޖޭއެސްސީގެ ލަފައަކަށް ރައީސް އެދިވަޑައިގަތުމަށް ފަހުއެވެ.
މިއަދުގެ މަޖިލީހުގެ ޖަލްސާގައި، އެދެބޭފުޅުން ސުޕްރީމް ކޯޓަށް އައްޔަން ކުރުމަށް ޖުޑިޝަރީ ކޮމެޓީއަށް ވަނީ ފޮނުއްވާފައެވެ.
ޖޭއެސްސީން ރައީސަށް ލަފާ އެރުވީ އެދެބޭފުޅުން އައްޔަން ކުރުމަށެވެ. ސުޕްރީމް ކޯޓުގެ ފަނޑިޔާރު ކަމަށް ރައޫފް އައްޔަން ކުރުމާ މެދު ޖޭއެސްސީން ރައީސަށް ލަފައެއް އަރުވާފައެއް ނުވެއެވެ.
އެކަމާ ގުޅޭ ގޮތުން ރޭ ޖޭއެސްސީއިން ބޭއްވި ބައްދަލުވުމުގައި އެކުލަވާލި ރިޕޯޓްގައި އުއްތަމަ ފަނޑިޔާރުގެ މަގާމަށް އައްޔަން ކުރުމަށް ޖޭއެސްސީއަށް ފެންނަ ކަމަށް ބަޔާން ކޮށްފައިވަނީ މުއުތަސިމްގެ ނަމެވެ. އަދި ސުޕްރީމް ކޯޓު ފަނޑިޔާރުގެ މަގާމަށް އައްޔަން ކުރަން ފެންނަ ކަމަށް ބަޔާން ކޮށްފައިވަނީ ހުސްނުއްސުއޫދުގެ ނަން އެކަންޏެވެ. އެ ދެ ބޭފުޅުން "ހައިލީ ރިކޮމެންޑެޑް" ބޭފުޅުންގެ ގޮތުގައި ރައީސްއަށް ލަފާ އަރުވާފައިވެއެވެ.
އުއްތަމަ ފަނޑިޔާރު ކަމަށާއި، ސުޕްރީމް ކޯޓުގެ ދެ ފަނޑިޔާރެއްގެ މަގާމަށް ބޭފުޅުން އައްޔަން ކުރުމަށް ރައީސް ނަން ފޮނުއްވީ، އެ މަގާމުތައް ދާދި ފަހުން ހުސްވެފައިވުމުގެ ސަބަބުންނެވެ. ސުޕްރީމް ކޯޓުން ތިން މަގާމެއް ހުސްވެފައި ވަނީ އެ ކޯޓުގެ ފަނޑިޔާރުންގެ ގޮތުގައި ތިއްބެވި ދެ ފަނޑިޔާރަކު މަގާމުން ވަކިކޮށް، އެއް ފަނޑިޔާރަކު ރިޓަޔާ ކުރެއްވުމާ ގުޅިގެންނެވެ. އެގޮތުން، ފަނޑިޔާރުކަމުން ވަކި ކުރި ދެ ފަނޑިޔާރުންނަކީ އުއްތަމަ ފަނޑިޔާރު ކަމުގައި ހުންނެވި ޑރ. އަހްމަދު އަބްދުﷲ ދީދީ އާއި ފަނޑިޔާރު ކަމުގައި ހުންނެވި އާދަމް މުހައްމަދު އަބްދުﷲއެވެ.
