ކުރީގެ ރައީސް އަބދުﷲ ޔާމީން ޖަލަށް ލިއޭ ކިޔާފަ އިތުރު ލީޑަރަކު ނުހޯދާނެ ކަމަށް އިދިކޮޅުން ބުނެފިއެވެ.
އިދިކޮޅު ޕީޕީއެމް އަދި ޕީއެންސީގެ ފަރާތުން ނޫސްވެރިންނަށް މައުލޫމާތު ދެއްވަމުން ޕީއެންސީގެ ރައީސް އަބްދުރަހީމް އަބްދުﷲ (އަދުރޭ) ވިދާޅުވީ، ރައީސް ޔާމީން ޖަލަށް ލިޔަސް، އިދިކޮޅުން އިތުރު ލީޑަރަކު ނުހޯދާނެ ކަމަށާއި، އިތުރު ލީޑަރަކު ހޮވުމަށް ޕާޓީން ކޮންގްރެސް އެއްވެސް ނުބާއްވާނެ ކަމަށެވެ.
އަދުރޭ ވިދާޅުވީ، މިއަދު ރައީސް ޔާމީންގެ މައްޗަށް މަނީ ލޯންޑާ ކުރުމުގެ ކުށް ސާބިތުވެ، 5 އަހަރަށް ޖަލަށްލުމަށް ކްރިމިނަލް ކޯޓުން ކުރި ހުކުމް ބަލައިނުގަންނަ ކަމަށާއި، އެއީ ސިޔާސީ ހުކުމެއް ކަމަށެވެ. ޕީޕީއެމްގެ ރައީސަކަށް ދެން ވަޑައިގަންނަވާނީ ކޮން ބޭފުޅެއްތޯ ނޫސްވެރިން ކުރި ސުވާލަކަށް ޖަވާބު ދެއްވަމުން އަދުރޭ ވިދާޅުވީ، އިދިކޮޅުގެ ލީޑަރެއް ކަމުގައި އަދިވެސް ދެކިވަޑައިގަންނަވާނީ ރައީސް ޔާމީން ކަމަށެވެ.
އަދުރޭ މިހެން ވިދާޅުވެފައިވާއިރު، ހުކުމް ތަންފީޒުކުރުމަށްޓަކައި ޖަލުގައި ބަންދުކުރެވިފައި ހުންނަ މުއްދަތުގައި، ސިޔާސީ ޕާޓީއެއް ނުވަތަ ޖަމިއްޔާއެއްގެ އާންމު މެމްބަރެއްގެ ހައިސިއްޔަތުން ނިސްބަތްވުން ފިޔަވާ އެހެން މަސްއޫލުވެރި ފަރާތެއްގެ ގޮތުން ނުވަތަ އެތަންތަނުން ހިންގާ ހަރަކާތެއްގައި ބައިވެރިވުމުގެ ހައްގު ނުލިބޭނެ ކަމަށް ބުނެ ޖަލުތަކާއި ޕެރޯލް ގާނޫނަށް އިސްލާހު ގެނެސްފައިވަނީ ރައީސް ޔާމީންގެ ސަރުކާރުންނެވެ.
މީގެ އިތުރުން އިދިކޮޅުން ވަނީ މީގެ ކުރިން 'ދަ ޕްރެސް' އަށް މައުލޫމާތު ދެމެން، ރައީސް ޔާމީން ނެތް ހާލަތެއްގައި ޕީޕީއެމްގެ ރައީސް ކަމަށް ވަޑައިގަންނަވާނީ ނައިފަރު ދާއިރާގެ މެންބަރު އަދި ޕީޕީއެމްގެ ނައިބު ރައީސް އަހްމަދު ޝިޔާމް ކަމަށް އިޝާރާތް ކޮށްފައެވެ.
ރައީސް ޔާމީން ޖަލު ބަންދު ކުރުމާއި ގުޅިގެން، އެމަނިކުފާނަށް ލިބިވަޑައިގެންނެވި ރައީސްކަން ކުރައްވާފައިވާ ފަރާތްތަކަށްދޭ އިނާޔަތް ވެސް ދެން ލިބިވަޑައިނުގަންނަވާނެއެވެ. ރައީސްކަން ކުރައްވާފައިވާ ބޭފުޅުންނަށް ލިބިވަޑައިގަންނަވާ އިނާޔަތްތަކާ ބެހޭ ގާނޫނަށް ގެނެސްފައިވާ އިސްލާހެއްގައި ވާގޮތުން، ޖިނާއީ ކުށެއް އެ ރައީސެއްގެ މައްޗަށް ސާބިތުވެއްޖެ ކަމުގައިވާނަމަ، އެ ރައީސަކަށް، އަދި އެ ރައީސެއްގެ އާއިލާއަށް ލިބެމުންދާ އިނާޔަތްތައް ހުއްޓޭނެއެވެ.
މަނީ ލޯންޑާ ކުރުމުގެ ކުށް ރައީސް ޔާމީނަށް ސާބިތުވެފައިވާއިރު، ދައުލަތުން ވަނީ މަނީ ލޯންޑާ ކުރުމުގެ ކުށަށް ކަނޑައެޅިފައިވާ އެންމެ ކުޑަ އަދަބު ކަމަށްވާ 5 އަހަރަށް ޖަލަށް ލުމުގެ އަދަބު ރައީސް ޔާމީނަށް ކަނޑައަޅާފައެވެ. އަދި މިއާއެކު ކްރިމިނަލް ކޯޓުން ވަނީ ރައީސް ޔާމީން، 5 މިލިއަން ޑޮލަރުން ޖުރިމަނާ ކޮށް، މި ފައިސާ ހަ މަސް ދުވަހުގެ ތެރޭގައި މޯލްޑިވްސް އިންލެންޑް ރިވެނިއު އޮތޯރިޓީއަށް ދެއްކުމަށް ވެސް ހުކުމްކޮށްފައެވެ.
