ރައީސް އިބްރާހިމް މުހައްމަދު ސޯލިހް، މިނިސްޓްރީ އޮފް އާޓްސް، ކަލްޗާ އެންޑް ހެރިޓޭޖްގެ މުޝީރުންގެ ގޮތުގައި ހަތަރު ބޭފުޅަކު އައްޔަން ކުރައްވައިފިއެވެ.
ހެރިޓޭޖް މިނިސްޓްރީއަށް އައްޔަނު ކުރި މުޝީރުންނާ ބައްދަލުކުރައްވައި ރައީސް ސޯލިހް ވިދާޅުވީ ރާއްޖޭގެ ތާރީހާއި ސަގާފަތް ދިރުވާ އާލާކުރުމުގެ މަސައްކަތުގައި، މިނިސްޓްރީ އޮފް އާޓްސް، ކަލްޗާ އެންޑް ހެރިޓޭޖަށް ބޭނުންވާ ފަންނީ ލަފަޔާއި އިރުޝާދު ދެއްވާނެ ކަމުގެ އުއްމީދު ކުރައްވާ ކަމަށެވެ. އަދި މިއަދު އައްޔަންކޮށްފައިވާ މުޝީރުންނަށް ލިބިވަޑައިގެންފައިވާ ތަޖުރިބާގެ ބޭނުން ހިތްޕަވައި، ދިވެހީންގެ ތަރިކަ އަންނަން އޮތްޖީލުތަކަށް ފެންނާނެ ފަދައިން ރައްކާތެރި ކުރެއްވުމަށް މުހިއްމު މަސައްކަތްތަކެއް ކޮށްދެވާނެ ކަމަށް އުއްމީދު ކުރައްވާ ކަމަށް ވެސް ރައީސް ސޯލިހް ވިދާޅުވިއެވެ.
މިނިސްޓްރީ އޮފް އާޓްސް، ކަލްޗާ އެންޑް ހެރިޓޭޖަށް އައްޔަންކުރި މުޝީރުން:
- ނިޝާން އިއްޒުއްދީނުގެ އިއްޒަތުގެވެރިޔާ ނަސީމާ މުހައްމަދުކަލޭފާނު، ހ. މާގިރި
- ނިޝާން އިއްޒުއްދީނުގެ އިއްޒަތުގެވެރިޔާ އައްބާސް އިބްރާހީމް، މ. ސިލްވާކްލައުޑް
- ނިޝާން އިއްޒުއްދީނުގެ އިއްޒަތުގެވެރިޔާ އަބްދުﷲ ސާދިގު، ހ. އާމުލީގެ
- މުހައްމަދު ވަހީދު، މ. މަޑުލު
މި ހަތަރު ބޭފުޅުންނަށް މަގާމު ހަވާލުކުރުމުގެ ގޮތުން ބޭއްވި ރަސްމިއްޔާތު އޮތީ މިއަދު ހެނދުނު ރައީސް އޮފީހުގައެވެ.
މި ބައްދަލުކުރެއްވުމުގައި، މުޝީރުންގެ ގޮތުގައި އައްޔަންކުރެވުނު ބޭފުޅުން ވަނީ ދިވެހި ތާރީހާއި ސަގާފަތް ރައްކާތެރިކޮށް ބެލެހެއްޓުމުގެ މަގުގައި މިއަދު މި ދެއްވި ފުރުސަތަށްޓަކައި ރައީސް ސޯލިހަށް ޝުކުރު އަދާކުރައްވާފައެވެ. އަދި މި މަސައްކަތް ކުރިޔަށް ގެންދިއުމަށްޓަކައި އެބޭފުޅުންގެ ހުރި ވިސްނުންފުޅު ރައީސް ސޯލިހާއި ވަނީ ހިއްސާ ކުރައްވާފައެވެ. މީގެ އިތުރުން އެބޭފުޅުން ވަނީ މި މަސައްކަތް ކުރުމުގައި އެބޭފުޅުންގެ ލަޔާގަތާއި ގާބިލުކަންހުރި މިންވަރަކުން އެ މަސައްކަތް ކޮށްދެއްވާނެ ކަމުގައި ވިދާޅުވެފައެވެ.
