ސެންޓާ ފޯ ހަޔާ އެޑިއުކޭޝަން (ސީއެޗްއެސްއީ)ގެ ޓީޗަރަކު ދަރިވަރުންނަށް ޖިންސީ ފުރައްސާރަ ކުރާ މައްސަލަ އެޑިއުކޭޝަން މިނިސްޓްރީން ބަލަން ފަށައިފިއެވެ.
އެޑިއުކޭޝަން މިނިސްޓްރީން މިއަދު ނެރުނު ނޫސް ބަޔާނުގައި ބުނީ ސީއެޗްއެސްސީގެ އިސްލާމް ޓީޗަރެއް ކަމަށްވާ ހަސަން ޒަރީރު ޖިންސީ ފުރައްސާރަ ކުރާ ކަމަށް ބުނެ ސޯޝަލް މީޑިއާގައި ދެކެވެމުންދާ ވާހަކަތަކާ ގުޅިގެން އެ މައްސަލަ ސީރިއަސް މައްސަލައެއްގެ ގޮތުގައި ބަލަމުން އަންނަ ކަމަށެވެ.
އެޑިއުކޭޝަން މިނިސްޓްރީން ބުނީ، މިހާތަނަށް ބެލި ބެލުމުން ދަރިވަރުން ކަނބޮޑުވުން ފާޅުކޮށް ސޯޝަލް މީޑިއާގައި ދައްކާފައިވާ ވާހަކަތަކަކީ ޒަރީރުގެ ފަރާތުން ފެނިފައިވާ ކަންތައް ކަމުގައި ބެލެވޭ ކަމަށެވެ. އަދި މިފަދަ ކަންތައްތަކަކީ އިތުބާރުކުރެވޭ ފަދަ މަގާމެއްގައި ހުރި މީހަކު އޭނާގެ ބެލެހެއްޓުމުގައިވާ ފަރާތަކާމެދު ހިންގައިގެންވާނެ ފަދަ އަމަލުތައް ނޫން ކަމަށް އެ މިނިސްޓްރީނ ބުނެއެވެ.
އެޑިއުކޭޝަން މިނިސްޓްރީގެ ބަޔާނުގައި ބުނީ ކްލާސް ރޫމް އަދި ސްކޫލް މާހައުލަކީ ދަރިވަރުންނަށް ރައްކާތެރި މާހައުލަކަށް ހެދުމަށް އެ މިނިސްޓްރީން އިސްކަންދޭ ކަމަށެވެ. އަދި އެއްވެސް ބާވަތެއްގެ ފުރައްސާރައެއް ދަރިވަރުންނަށް ކުރިމަތިވާނެ ފަދަ އަމަލެއް ސްކޫލުގެ އެއްވެސް މުވައްޒަފެއްގެ ފަރާތުން ހިންގަފައިވާނަމަ އެކަމެއް ބަލައި އެންމެ ހަރުކަށި ފިޔަވަޅު އަޅާނެ ކަމަށާއި ވޭތުވެދިޔަ އަހަރުތަކުގައި ވެސް އެފަދައިން އަމަލުކޮށްފައިވާނެ ކަމަށް އެ ބަޔާނުގައި ބުނެފައިވެއެވެ.
މީގެ އިތުރުން އެޑިއުކޭޝަން މިނިސްޓްރީން ވަނީ، ދަރިވަރެއްގެ ޖިސްމަށް، އަބުރަށް އަދި ކަރާމާތަށް އުނިކަމެއް އަތުވެދާނެ ކަމެއް އެއްވެސް ފަރާތަކުން ކުރަނަމަ، އެކަމެއް ބަލާ ފިޔަވަޅު އަޅާނެ ކަމުގެ ޔަގީންކަން ދަރިވަރުންނާއި ބެލެނިވެރިންނަށް އަރުވާފައެވެ. އަދި ސްކޫލް މާހައުލަކީ ރައްކާތެރިކަމާއި އެކު ހިނިތުންވެ ތިބެ އުނގެނުމަށް ފަހި ފުރުސަތުތަކެއް ތަނަވަސްވެފައިވާ ތަނަކަށް ހެދުމަށް އަބަދުވެސް މަސައްކަތް ކުރާނެ ކަމަށް އެ މިމނިސްޓްރީން ބުނެއެވެ.
