އަސްކަރީ ޔުނިފޯމް ލުމަށްފަހު، ކޮންމެ ކުއްޖެއްގެ އަމިއްލަ ފަރުދީ ޝަހްސިއްޔަތުގެ މައްޗަށް އިސްވާނީ، އޭނާއަކީ ދިވެހި ގައުމީ ދިފާއީ ބާރަށް ނިސްބަތްވާ ދިވެހި ސިފައިންގެ މީހެއްކަމުގައި ވާކަން ކަމަށް، ޑިފެންސް މިނިސްޓަރު މާރިޔާ އަހްމަދު ދީދީ ވިދާޅުވެއްޖެއެވެ. އެވެ.
މޯލްޑިވްސް ނޭޝަނަލް ޑިފެންސް ފޯސްގެ 65 ވަނަ އަސާސީ ތަމްރީން ކޯސް ނިންމުމުގެ ރަސްމިއްޔާތު، ޝަރަފުވެރި ކޮށްދެއްވައި ވާހަކަ ދައްކަވަމުން މިނިސްޓަރު މާރިޔާ ވަނީ، ސިފައިންގެއާ އަލަށް ގުޅުނު ސިފައިންނާ މުހާތަބު ކުރައްވާ އަސްކަރީ ޔުނިފޯމާ ގުޅިފައިވާ މަތިވެރި ވާޖިބުތަކާ ޒިންމާތަކުގެ މަތިން ހަނދާންކޮށްދެއްވާފައެވެ. އެގޮތުން، އަސްކަރީ ޔުނިފޯމް ލުމަށްފަހު، ކޮންމެ ކުއްޖެއްގެ އަމިއްލަ ފަރުދީ ޝަހްސިއްޔަތުގެ މައްޗަށް އިސްވާނީ، އޭނާއަކީ ދިވެހި ގައުމީ ދިފާއީ ބާރަށް ނިސްބަތްވާ ދިވެހި ސިފައިންގެ މީހެއްކަމުގައި ވާކަން ކަމަށް، މާރިޔާ ވިދާޅުވިއެވެ.
އިއްޔެ، ގިރިފުށީ ޓްރެއިނިން ސެންޓަރުގައި ކުރިއަށްދިޔަ މި ރަސްމިއްޔާތުގައި ވާހަކަ ދައްކަވަމުން، މިނިސްޓަރު މާރިޔާ ވަނީ، ދިވެހި ސިފައިންގެ މައިންބަފައިންނަށާއި އާއިލާތަކަށް، ހާއްސަ ޝުކުރެއް ރައްދުކުރައްވާފައެވެ. މާރިޔާ ވިދާޅުވީ، ނުހަނު ލޯބިން ބަލާބޮޑުކުރާ ދަރިފުޅު، ދީނާއި ގައުމުގެ ދިފާއުގައި، ހަށިގަނޑާއި ފުރާނައިން ގުރުބާންވުމަށް، ހަދިޔާކުރާ ކުރުން ދައުލަތުން ބަލައިގަންނަނީ، ނުހަނު ޝުކުރުވެރިކަމާއި އިހްތިރާމާ އެކީގައި ކަމަށެވެ.
މި ރަސްމިއްޔާތުގައި މިނިސްޓަރުގެ އިތުރުން، ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލާއި، ވައިސް ޗީފް އޮފް ޑިފެންސް ފޯސް ބްރިގޭޑިއާ ޖެނެރަލް އަބްދުއްރަހީމް އަބްދުއްލަތީފާއި، ޖެނެރަލް އޮފިސަރުންނާއި، ސިފައިންގެ އެކި ރޭންކުތަކުގެ އޮފިސަރުންގެ އިތުރުން، އަސާސީ ތަމްރީން ކޯސް ފުރިހަމަކުރި ސިފައިންގެ އާއިލާތަކުގެ މެންބަރުން ވަނީ ބައިވެރިވެފައިވެއެވެ.
