އުމުރުން 13 އަހަރުގެ ކުޑަކުއްޖަކު ބަލިވެ އިން މައްސަލާގައި އިހުމާލުވި އިދާރާތަކާއި މީހުންނަށް ހައްގު އަދަބު ދިނުމަށް ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ގޮވާލައްވައިފިއެވެ.
ފުލުހުން ބުނެފައިވަނީ އުމުރުން 13 އަހަރުގެ ކުއްޖަކު ބަނޑުބޮޑުވި މައްސަލައެއް ޖެންޑާ މިނިސްޓްރީއާ ގުޅިގެން ފުލުހުން ބަލަމުން އަންނަ ކަމަށެވެ. ނަމަވެސް އެކަމާ ގުޅޭ އިތުރު ތަފްސީލެއް ހާމަކޮށްފައެއް ނުވެއެވެ.
މިކަމާއި ގުޅިގެން ރައީސް ނަޝީދު ކުރެއްވި ޓްވީޓެއްގައި ވިދާޅުވީ 13 އަހަރުގެ ކުޑަ އަންހެން ކުއްޖެއްގެ ނާޖާއިޒު ބޭނުން ހިފާ ޖިންސީ ގޯނާކޮށް އޭގެ ނަތީޖާއިން އެކުއްޖާ ބަލިވެ އިނދެ އެކުއްޖާއަށް ދިން އަނިޔާ އެންމެ ހަރުކަށި އިބާރާތުން ކުށްވެރިކުރާ ކަމަށެވެ. އަދި މިކަމުގައި އިހުމާލު އިދާރާތަކާއި ހިތްވަރުދިން ފަރާތްތަކަށް އަދަބު ލިބެންޖެހޭ ކަމަށެވެ.
ފުލުހުންގެ އިތުރުން ޖެންޑާއިންވެސް ވަނީ އެކަމާ ގުޅިގެން ޓްވީޓެއް ކޮށްފަ އެވެ. ޖެންޑާއިން ބުނީ ކުޑަ ކުއްޖަކު ބަލިވެއިން ކަމުގެ ރިޕޯޓެއް ލިބުމާ ގުޅިގެން މިނިސްޓްރީން ފުރިހަމަ ކުރަންޖެހޭ އިޖުރާއަތްތައް ވަގުތުން ފުރިހަމަކޮށް، ތުހުމަތުކުރެވޭ ބޮޑެތި މީހުންނާމެދު ފިޔަވަޅު އަޅައިދިނުމަށް ތަހުގީގީ އިދާރާއަށް ރަސްމީކޮށް އެދިފައިވާކަމަށެވެ.
ލަނޑާ ނަގާ ދޯންޏެއްގައި އިއްޔެ މާރާމާރީ ހިންގައި ޒުވާނަކު ކަނޑަށް އެއްލާލި މައްސަލައެއް ފެންމަތިވެފައި ވާއިރު، އެމާރާމާރީގައި ކަނޑަށް އެއްލާލި ރ. މަޑުވައްރީ މީހާއަކީ 13 އަހަރުގެ އަންހެން ކުއްޖަކާ ކޯޓުން ބޭރުން ކައިވެނި ކޮށްގެން އުޅޭ މީހެއް ކަމަށް މައުލޫމާތު ލިބިފައިވެއެވެ. އަދި އެކުއްޖާ ބަލިވެއިން މައްސަލައެއް ޖެންޑާއިން ބެލިކަމަށްވެސްވެއެވެ.
މައުލޫމާތު ލިބިފައިވާ ގޮތުގައި އެކުއްޖާ މިހާރު އިނީ އެކުއްޖާގެ މަންމަގެ ބެލުމުގެ ދަށަށް ދޫކޮށްލާފަ އެވެ.
