ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ ހޫނުވެ، ބޮޑު ޒުވާބަކަށް ބަދަލުވެއްޖެއެވެ.
ސަލާމަތީ ހިދުމަތްތަކާ ބެހޭ ކޮމިޓީ ހޫނުވެ، ޒުވާބަކަށް ބަދަލުވެފައިވަނީ، ކޮމިޓީގެ ބައްދަލުވުން ކުރިއަށް ގެންދަމުން ދަނިކޮށް ނައިފަރު ދާއިރާގެ މެންބަރު އަހްމަދު ޝިޔާމް އަދި މާވަށު ދާއިރާގެ މެންބަރު މުހައްމަދު ސައީދު އަޑުގަދަ ކުރައްވަން ފެށުމުންނެވެ. ބައްދަލުވުން ޒުވާބަކަށް ބަދަލުވެފައިިވާއިރު، ޝިޔާމާއި، ހެންވޭރު ހުޅަނގު ދާއިރާގެ މެންބަރު އަލީ އާޒިމާއި ގަލޮޅު ދެކުނު ދާއިރާގެ މެންބަރު އީވާ އަބްދުﷲއާ ދެމެދު ވަނީ ބަހުގެ ހަމަލާތައް ބަދަލުކުރައްވާފައެވެ. ސައީދާއި ޝިޔާމަކީ ވެސް މި ކޮމިޓީގައި ހިމެނޭ މެންބަރުންނެއް ނޫނެވެ.
ކޮމިޓީ ހޫނުވެ، މެންބަރުން ޒުވާބު ކުރައްވަން ފެށުމުން މެންބަރުންނަށް މަސައްކަތް ކުރެއްވުމުގެ ފުރުސަތު ދެއްވުން އެދި ޝިޔާމް ވަނީ ކޮމިޓީން ބޭރުކޮށްލައްވާފައެވެ.
ސަލާމަތީ ހިދުމަތްތަކާ ބެހޭ ކޮމިޓީގެ ބައްދަލުވުމެއް މިރޭ ބާއްވާފައިވަނީ އުނގޫފާރު ދާއިރާގެ ކުރީގެ މެންބަރު ޑރ. އަފްރާޝީމް އަލީ އަވަހާރަކޮށްލުމާ ގުޅޭ ގޮތުން، މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަނުން ތައްޔާރުކުރި ރިޕޯޓު ދިރާސާކޮށް، ސަލާމަތީ ހިދުމަތްތަކާ ބެހޭ ކޮމިޓީން އެކުލަވާލި ސަބް ކޮމިޓީން ފާސްކުރި ރިޕޯޓުގެ މައްސަލާގައި އިދިކޮޅު މެމްބަރުން ބޮޑު ތުހުމަތުތަކެއްކޮށް، މައްސަލަ ބޮޑުވުމުންނެވެ.
