ލ. މެންދޫއިން ގަވާއިދާ ހިލާފަށް ރުއްގަސް ނެގުމާ ގުޅިގެން އެންވާރަމަންޓް ޕްރޮޓެކްޝަން އެޖެންސީ (އީޕީއޭ) އިން މީހަކު ޖޫރިމަނާކޮށްފިއެވެ.
ލ. މެންދޫއަކީ ދަނޑުވެރިކަމުގެ މަސައްކަތްކުރުމަށް ހަސަން އާދިލް (އަސްރާރުގެ، ސ، މަރަދޫ) އަށް މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗާއިން ދޫކޮށްފައިވާ ރަށެކެވެ. ދަނޑުވެރިކަން ކުރުމަށް މެންދޫ ދޫކޮށްފައިވަނިކޮށް، އެރަށުން ރުއްގަސް ނެގުމުގެ މައްސަލާގައި އީޕީއޭއިން އާދިލް ޖޫރިމަނާ ކޮށްފައިވަނީ ޖުމްލަ 275000 ރުފިޔާއިންނެވެ. އީޕީއޭއިން ވަނީ މި ޖޫރިމަނާގެ ފައިސާ 30 ދުވަހުގެ މުއްދަތުގެ ތެރޭގައި އީޕީއޭއަށް ދެއްކުމަށް އާދިލަށް އަންގާފައެވެ.
އީޕީއޭއިން ބުނީ، މެންދޫގައި ދަނޑުވެރިކަން ކުރުމުގެ ގޮތުން އާދިލަށް އެރަށް ދޫކޮށްފައިވަނީ މިދިޔަ އަހަރު ސެޕްޓެމްބަރު މަހު 10 ވަަނަ ދުވަހު ތިމާވެއްޓަށް އަސަރުފޯރާނެ މިންވަރު ބަޔާންކުރާ ރިޕޯޓެއް ހުށަހެޅުމަށްފަހު، މިދިޔަ އަހަރު ނޮވެމްބަރު މަހު 25 ވަނަ ދުވަހު މި ރިޕޯޓު ފާސްކޮށް އެ އެޖެންސީން ވަނީ ތިމާވެށީގެ ނިންމިގޮތުގެ ލިޔުމާއި އެކުއެވެ. ނަމަވެސް، އެ ހުއްދައިގެ ބޭރުން ރަށުގެ އިރުއުތުރު ފަރާތުން ރުއްގަސް ނަގާ، 4،822 އަކަ މީޓަރުގެ ސަރަހައްދެއް ސާފުކޮށް މަގެއް ހަދާފައިވާ ކަމަށް އީޕީއޭން ބުނެއެވެ.
މީގެ އިތުރުން އީޕީއޭން ބުނީ، އާދިލް ޖޫރިމަނާ ކޮށްފައިވަނީ ރާއްޖޭގެ ތިމާވެށި ރައްކާތެރިކޮށް ދެމެހެއްޓުމާއި ބެހޭ ގާނޫނުގެ ދަށުން ހެދިފައިވާ ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދުގެ 16 ވަނަ މާއްދާގެ ދަށުން އަދި ތިމާވެއްޓަށް އަސަރުފޯރާ މިންވަރު ބަޔާންކުރާ ރިޕޯޓު ހެދުމާބެހޭ ގަވާއިދުގެ 20 ވަނަ މާއްދާގެ (ހ) ގެ 10 ވަނަ ނަންބަރަށް ރިއާޔަތްކޮށް ކަމަށެވެ.
