ހައްދު ފަހަނައަޅާފައިވާ ހަނގުރާމަވެރި ޓެރަރިސް އައިސިސް ޖަމާއަތުގެ މައްޗަށް ނަސްރު ލިބިފައިވާކަމަށް އަފްގާނިސްތާނުގެ ރައީސް އަޝްރަފު ޣަނީ ވިދާޅުވެއްޖެއެވެ.
ހަނގުރާމަވެރި ތޯލިބާން ޖަމާއަތުގެ ގައިދީން ބަދަލު ކުރުމަށް ވެވުނު އެއްބަސްވުމާއެކު އަފްގާނިސްތާނަށް ސުލްހަ ލިބިދާނެ ކަމުގެ އުއްމީދު އާވިތާ މާ ގިނައިރުތަކެއް ނުވެ އަޝްރަފު ވިދާޅުވީ، އަފްގާނިސްތާނުގައި ހަރަކާތްތެރިވަމުންދިޔަ އައިސިސް ޖަމާއަތް މުޅިން ނެތިކޮށްލާފައިވާކަމަށެވެ.
އަފްގާނިސްތާނުގައި ސުލްހަ ގާއިމު ކުރުމަށް އެގައުމުގެ ކަމާ ބެހޭ ފަރާތްތަކުން ވަރުގަދަ އޮޕަރޭޝަނެއް ފަށާފައިވަނިކޮށް ފާއިތުވީ ހަފުތާތަކުގެ ތެރޭގައި އައިސިސްގެ 600 އަށްވުރެ ގިނަ ހަނގުރާމަވެރިންނާ އެމީހުންގެ އާއިލާތަކުން އަމާން ދީ، އަފްގާނިސްތާނުގެ ސަރުކާރުގެ ބެލުމުގެ ދަށަށް އައިސްފައިވާކަމަށް އެގައުމުން ވަނީ ހާމަކޮށްފައެވެ.
އަފްގާނިސްތާނުގައި އޮތް އައިސިސްގެ ގޮފި އުވިގެންދިޔައީ އަފްގާނިސްތާނުގެ ސަރުކާރުން ހިންގި އޮޕަރޭޝަންގެ އިތުރުން، އެ ޖަމާއަތަށް ފަންޑު ނުލިބުމުގެ ސަބަބުންކަންވެސް އަފްގާނިސްތާނުގެ އޮފިޝަލުން ވަނީ ފާހަގަކުރައްވާފައެވެ.
އަފްގާނިސްތާނުގައި ހަނގުރާމަވެރިންގެ ނުރައްކާ އެންމެ ގަދަވި ނަންގަރުހާރް ޕްރޮވިންސްގައި އިސް ރަށްވެހިންނާއެކު ކުރިއަށް ގެންދެވި ބައްދަލުވުމެއްގައި ވާހަކަފުޅު ދައްކަވަމުން އަޝްރަފު ވިދާޅުވީ، މީގެ އަހަރެއްހާ ދުވަސް ކުރިއަށް ބަލާއިރު އަފްގާނިސްތާނަށް ލިބުނު ކާމިޔާބީ ހާސިލުވެދާނެ ކަމަށް އެއްވެސް މީހަކު ހީވެސް ނުކުރާނެ ކަމަށެވެ.
އައިސިސް ހަނގުރާމަވެރިންނާ އެމީހުންގެ އާއިލާތަކުން އަފްގާނިސްތާނުގެ ސަރުކާރަށް އަމާންދީފައިވާއިރު، އެ އާއިލާތަކާ މެދު އިންސާނިއްޔަތު ކަމާއެކު އަމަލުތައް ބެހެއްޓުމަށް ކަމާބެހޭ ފަރާތްތަކަށް އަންގަވާފައިވާނެ ކަމަށްވެސް އަޝްރަފު ވަނީ ހާމަކުރައްވާފައެވެ.
އައިސިސް ޖަމާއަތުގެ އަފްގާން ގޮތްޕާ ގުޅުނު ބޭރު ގައުމުތަކުގެ ހަނގުރާމަވެރިންގެ ތެރޭގައި ތަޖިކިސްތާނު، އުޒްބަކިސްތާނު، ކަޒަކިސްތާނު، އަޒަރުބައިޖާން، އީރާނު އަދި ޕާކިސްތާނުގެ އިތުރުން ދިވެހި ރާއްޖެއަށް ނިސްބަތްވާ ބަޔަކުވެސް ތިބިކަމަށް އަފްގާނިސްތާނުގެ ސަރުކާރުންވަނީ ހާމަކޮށްފައެވެ.
އައިސް އަފްގާނިސްތާނު ގޮތްޕާ ގުޅުންހުރި ދިވެހިންތަކެއް ތިބިކަމާ، އެމީހުން އަފްގާނިސްތާނުގެ ސަރުކާރަށް އަމާން ދީފައިވާކަމަށް ބުނާ މައްސަލާގައި ދިވެހި ސަރުކާރުން އަދި ރަސްމީ ސިފައެއްގައި އެއްޗެއް ބުނެފައެއް ނުވެއެވެ.
