ދުނިޔޭގެ ރެކޯޑު ފޮތުގައި ރާއްޖޭގެ "ފްރީޑައިވިންގް ވޯލްޑް ރެކޯޑް" ހިމަނައިފިއެވެ.
ދުނިޔޭގެ ރެކޯޑު ފޮތުގައި ރާއްޖޭގެ މި ރެކޯޑު ހިމަނާފައި ވާ ކަން އިއުލާން ކޮށްފައި ވަނީ މިއަދެވެ. ނަމަވެސް ފްރީޑައިވިންގް ހަރަކާތް ކާމިޔާބުކަމާއެކު ނިންމާލުމުން ގިނިސް ވާލްޑް ރިކޯޑުގެ އޮފިޝަލުން ވަނީ "ނޭވާ" ފްރީޑައިވިންގް ހަރަކާތަކީ ދުނިޔޭގެ އާ ވާލްޑް ރިކޯޑެއްކަމުގައި ކަނޑައަޅައި ރައީސްއަށް އެކަމުގެ ހަނދާނީ ލިޔުން ވަނީ ހަވާލުކޮށްފައެވެ.
މި ހަރަކާތަކީ މިއަހަރުގެ ފަތުރުވެރިކަމުގެ ދުވަސް ފާހަގަކުރުމުގެ ގޮތުން މިދިޔަ އޮކްޓޯބަރު މަހުގެ 1 ވަނަ ދުވަހު ބަރޮސް ރިސޯޓު ކައިރީ، އަޑިން ކުރިއަށް ގެންދިޔަ ހަރަކާތެކެވެ. މިނިސްޓްރީ އޮފް ޓޫރިޒަމުން އިންތިޒާމް ކޮށްގެން "ނޭވާ" ގެ ނަމުގައި ކުރިއަށް ގެންދިޔަ މި ޕްރޮގްރާމްގެ ރެކޯޑު ހެދުމުގައި ރާއްޖޭގެ ރައީސް އިބްރާހިމް މުހައްމަދު ސޯލިހާއި އެކު ޖުމްލަ 521 ޑައިވަރުން ފީނާފައި ވެއެވެ. ރާއްޖޭގެ ޑައިވަރުން މި ރެކޯޑް ހެދުމަށް 30 ސިކުންތު ވަންދެން 3 މީޓަރު އަޑިއަށް ވަނީ ފީނާފައެވެ.
މި ހަރަކާތުގައި ދުނިޔޭގެ ވާލްޑް ރިކޯޑް ދެފަހަރަށް ހާސިލުކޮށް، ވާލްޑް ޗެންޕިއަން ފްރީޑައިވާގެ މަގާމު ހާސިލުކޮށްފައިވާ ނިއުޒީލެންޑްގެ ރައްޔިތެއްކަމަށްވާ ވިލިއަމް ޓްރޫބްރިޖް ވެސް ވަނީ ބައިވެރިވެފައެވެ.
"ނޭވާ" ގެ ނަމުގައި ހިންގި މި ފްރީޑައިވިންގް ހަރަކާތަކީ 2009 ވަނަ އަހަރު 280 މީހުންނާއެކު އިޓަލީގެ ވެރޯނާގައި ގާއިމުކޮށްފައިވާ ވާލްޑް ރިކޯޑް މުގުރާލުމަށް ރާއްޖެއިން ހެދި އާ ފްރީ ޑައިވިންގް ރެކޯޑެކެވެ.
