ނޭޝަނަލް އިންޓެގްރިޓީ ކޮމިޝަން (އެންއައިސީ) ގެ މެންބަރު ކަމަށް މާލޭގެ މޭޔަރު ޝިފާ މުހައްމަދުގެ ފިރިކަލުން ކާނަލް ރިޓަޔާޑް އަހުމަދު ޖިހާދު، ވ. ތިވެލި އައްޔަން ކުރަން ރުހުން ދިނުމަށް ރައްޔިތުންގެ މަޖިލީހުން ފާސްކޮށްފިއެވެ.
އެންއައިސީގެ މެންބަރު ކަމަށް އައްޔަން ކުރަން ރައީސް އިބްރާހިމް މުހައްމަދު ސޯލިހް ފޮނުއްވި ނަންތަކުގެ ލިސްޓްގައި ފުރަތަމަ އޮތީ ޖުޑިޝަލް ސާވިސް ކޮމިޝަން (ޖޭއެސްސީ) ގެ ކުރީގެ މެންބަރު ޝުއައިބް އަބްދުލް ރަހްމާނެވެ. އެންއައިސީއަށް ޝުއައިބް އައްޔަން ކުރުމަށް ނެގި ވޯޓުގައި ބައިވެރިވެވަޑައިގެންނެވި 74 މެންބަރުންގެ ތެރެއިން 62 މެންބަރުންގެ އަގުލަބިއްޔަތުން ފާސްކުރީ އޭނާ އައްޔަން ކުރަން ރުހުން ނުދިނުމަށެވެ.
މިނިވަން މުއައްސަސާތަކުގެ ކޮމިޓީން ތަޅުމަށް ފޮނުވި ލިސްޓުގެ ދެވަނާގައި އޮތީ ސިފައިންގޭގައި 30 އަހަރަށްވުރެ ގިނަ ދުވަހު އުޅުއްވި ކާނަލް ރެޓަޔަޑް އަހްމަދު ޖިހާދުގެ ނަމެވެ. އަހްމަދު ޖިހާދު އެ މަގާމަށް އައްޔަން ކުރުމަށް ފާސްކުރީ ނެގި ވޯޓުގައި ބައިވެރިވެވަޑައިގެންނެވި 78 މެންބަރުންގެ އިއްތިފާގުންނެވެ.
އެންއައިސީއަށް މެންބަރަކު އައްޔަން ކުރަން އިއްޔެ މަޖިލީހުން ފާސްކުރީ، އެ ކޮމިޝަންގެ ރައީސް ކަމުގައި ކުރިން ހުންނެވި މުހައްމަދު ފަރުހާދު އިސްތިއުފާ ދިނުމާ ގުޅިގެންނެވެ. އޭނާގެ އިސްތިއުފާއާ ގުޅިގެން އެންއައިސީގެ މެންބަރު ކަމަށް ކުރިމަތިލާން ދެ ފަހަރަކަށް ފުރުސަތު ހުޅުވާލިއެވެ
އިއްޔެގެ ޖަލްސާގައި ވަނީ މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ ޑިރެކްޓަރުންގެ ބޯޑުން ހުސްވެފައިވާ މެންބަރު ކަމަށް މަހްޒޫމް ސަލީމް، ޝަބްނަމްގެ ކ. ކާށިދޫ އައްޔަން ކުރަން ރުހުންދީފައެވެ.
