ފިލްމީ ތަރި މަލީހާ ވަހީދު (މަލް) ގެ މައްޗަށް ޑައިމޯފިން ޓްރެފިކް ކުރުމުގެ ދައުވާ އުފުލައި ޝަރީއަތް ފަށައިފިއެވެ.
ބައެއް މީޑީއާތަކުން ރިޕޯޓްކޮށްފައިވާ ގޮތުގައި، މަސްތުވާތަކެތީގެ ބާވަތެއް ކަމުގައިވާ ޑައިމޯފިން ޓްރިފިކް ކުރުމުގެ ދައުވާގެ އިތުރުން މަލްގެ މައްޗަށް ވަނީ ކެނަބިސް ބޭނުންކުރުމުގެ ދައުވާ ވެސް އުފުލާފައެވެ.
މަސްތުވާތަކެއްޗާއި އެކު މަލް ހައްޔަރުކުރީ، ފުލުހުންގެ އިންޓެލިޖެންސާއި އދ. މަހިބަދޫ ޕޮލިހާއި މާމިގިލީ ޕޮލިސް ގުޅިގެން ހިންގި އޮޕަރޭޝަނެއްގައި އދ. މާމިގިލިންނެވެ. ރައީސް ނަޝީދު ވަރަށް ބޮޑަށް ފާޑު ވިދާޅުވި އެ މައްސަލާގައި މަލްއާއެކު އިތުރު އަންހެނަކު ވެސް ހައްޔަރުކޮށްފައި ވެއެވެ. އެ ދެ މީހުން ހައްޔަރު ކޮށްފައިވަނީ މާލެއިން ފުރައިގެން މާމިގިއްޔަށް ދަތުރުކުރި ލޯންޗަކުން މަސްތުވާތަކެތި ގެންދާ ކަމަށް ފުލުހުންނަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނެއްގައެވެ.
އެ ދެމީހުންގެ ބަންދާމެދު ގޮތެއް ނިންމަން މަހިބަދޫ މެޖިސްޓްރޭޓް ކޯޓަށް ހާޒިރު ކުރުމުން ހޯމް މިނިސްޓްރީން ކަނޑައަޅާ ތަނެއްގައި ބަންދުގައި ބޭންދުމަށް ވަނީ މިދިޔަ އޮގަސްޓް މަސް ތެރޭގައި 15 ދުވަހުގެ ބަންދުގެ މުއްދަތެއް ޖަހާފައެވެ. މަލްގެ އިތުރުން އޭނާއާއެކު ދަތުރު ކުރި މީހާގެ މައްޗަށް ވެސް އެ ދެ ދައުވާ އުފުލާފައި ވާއިރު، ކްރިމިނަލް ކޯޓުގައި މިއަދު އޮތް އަޑުއެހުމުގައި ދެ މީހުން ވެސް ވަނީ ދައުވާއަށް އިންކާރު ކޮށްފައެވެ.
