ދިވެހި ރައްޔިތުން ދެއްވި އިތުބާރަށް ޝުކުރު އަދާކުރައްވައި، ރައްޔިތުންގެ ހިދުމަތުގައި ސާބިތުކަމާއި އެކުގައި ކުރިއަށް ވަޑައިގަންނަވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.

ވެރިކަމަށް އެއް އަހަރު މިއަދު ފުރިގެން ދިއުމާ ގުޅިގެން ރައީސް ކުރެއްވި ޓްވީޓެއްގައި ވިދާޅުވީ ރާއްޖެއަށް ހަމަޖެހުމާއި ފާގަތިކަން ގެނައުމަށް އެމަނިކުފާނާއި މަތިކުރެވުނު ޒިންމާއަށް އަހަރެއް ފުރިގެންދާއިރު ރައްޔިތުންގެ ފަރާތުން ލިބުނީ ފުރިހަމަ އެއްބާރުލުމެއް ކަމަށެވެ. އެކަމަށްޓަކައި ރައީސް ވަނީ ދިވެހި ރައްޔިތުންނަށް ޝުކުރު ދަންނަވާފައެވެ.

"ރާއްޖެއަށް ހަމަޖެހުމާއި ފާގަތިކަން ގެނައުމަށް އަޅުގަނޑާ މަތި ކުރެއްވި ޒިންމާއަށް އަހަރު ފުރިގެންދާއިރު ރައްޔިތުން ދެއްވި އިތުބާރާއި އެއްބާރުލެއްވުމަށް ޝުކުރު ދަންނަވަން. މާތް الله ގެ ވާގިފުޅާއެކު މިމަތިވެރި ހިދުމަތުގަ ސާބިތުކަމާއެކީ ކުރިއަށްދާނެ ކަމުގެ ޔަގީންކަން އަރުވަން." ރައީސް ވިދާޅުވިއެވެ.

މިދިޔަ އަހަރު ބޭއްވި ރިޔާސީ އިންތިހާބު ކާމިޔާބު ކުރައްވާ ރައީސް ސޯލިހު ރާއްޖޭގެ ވެރިކަމުގެ ހުވާ ކުރެއްވީ ނޮވެމްބަރު މަހުގެ 17ވަނަ ދުވަހުއެވެ. ރައީސް އިބްރާހިމް މުހައްމަދު ސޯލިހްއަކީ ރާއްޖޭ ދެވަނަ ޖުމްހޫރިއްޔާގެ ހަތްވަނަ ރައީސްވެސް މެއެވެ.

އިބްރާހިމް މުހައްމަދު ސޯލިހް