މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) މާލޭ އޭރިއާ ކޮމާންޑް އޮޕަރޭޝަން ސެންޓަރު، ރައީސް އަދި ސިފައިންގެ އެންމެ މަތީވެރިޔާ އިބްރާހީމް މުހައްމަދު ސޯލިހު މިއަދު ހުޅުއްވައިދެއްވައިފިއެވެ.
އެމްއެންޑީއެފްގެ މާލޭ ސަރަހައްދުގެ ކޮމާންޑް އޮޕަރޭޝަން ސެންޓަރު ހުޅުއްވައި ދެއްވީ، މިކަމަށްޓަކައި މިއަދު ހެނދުނު ބަންޑާރަކޮށީގައި ބޭއްވި ހާއްސަ ރަސްމިއްޔާތެއްގައެވެ. އަލަށް ހުޅުވި މި ސެންޓަރަކީ އެމްއެންޑީއެފްގެ އޭރިއާތަކުގެ އޮޕަރޭޝަން ސެންޓަރުތަކުގެ ގާބިލުކަން އިތުރުކުރުމަށް، ޒަމާނީ ޓެކްނޮލޮޖީއާއެކު ހިންގާ އޮޕަރޭޝަންތައް މޮނީޓަރ ކުރެވޭނެ ނިޒާމާއެކު އަޕްޑޭޓްކުރެވިފައިވާ މަރުކަޒެކެވެ.
ޒަމާނީ ވަސީލަތްތަކާއެކު ތައްޔާރުކޮށްފައިވާ މި ސެންޓަރުން ކުރަމުންދާނެ މަސައްކަތްތަކާއި ގުޅޭގޮތުން މި ރަސްމިޔާތުގައި ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލްވަނީ ވާހަކަފުޅު ދައްކަވާފައެވެ. އަދި މި ސެންޓަރުގެ މަސައްކަތްތަކުގެ ތައާރަފު، ރައީސުލްޖުމުހޫރިއްޔާއަށް އަރުވާފައިވަނީ އެމްއެންޑީއެފް މާލޭ އޭރިއާގެ ކޮމާންޑަރު ކާނަލް އަބްދުއްރައޫފެވެ.
މިއަދުގެ ރަސްމިއްޔާރުގައި މިނިސްޓާ އޮފް ޑިފެންސް އަލްއުސްތާޒާ މާރިޔާ އަހުމަދު ދީދީއާއި ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލާއި ޖެނެރަލް އޮފިސަރުންގެ އިތުރުން އެމްއެންޑީއެފް މާލޭ އޭރިއާގެ އޮފިސަރުންނާއި އެހެނިހެން ރޭންކުތަކުގެ ސިފައިން ބައިވެރިވެ ވަޑައިގެންނެވިއެވެ.
