ނުވަވަނަ ވަނަ ދިވެހި ފިލްމު އެވޯޑް ހަފުލާ، ރައީސް އިބްރާހިމް މުހައްމަދު ސޯލިހު ޝަރަފުވެރި ކޮށްދެއްވައިފިއެވެ.
ރައީސް އޮފީހުން ބުނީ ރޭ އޮލިމްޕަސް ސިނަމާގައި ބޭއްވި ހަފުލާއަކީ މިނިސްޓްރީ އޮފް އާރޓްސް، ކަލްޗާ އެންޑް ހެރިޓޭޖް އުފެދުމަށް ފަހު އެމިނިސްޓްރީގެ ބެލުމުގެ ދަށުން ބޭއްވި ހަފްލާއެއް ކަމަށެވެ. އަދި މިއީ ދިވެހި ފިލްމު އެވޯޑް ބޭއްވި ފުރަތަމަ ފަހަރެވެ. މިހަފްލާގައި، ފިލްމީ ދާއިރާއިން ލައިފް ޓައިމް އެވޯޑް ހާސިލުކުރި މުހައްމަދު ރަޝީދަށް އެވޯޑް ހަވާލުކޮށްދެއްވީ ރައީސެވެ.
މި ފަހަރުގެ ދިވެހި ފިލްމު އެވޯޑަށް 2017 އަދި 2018 ވަނަ އަހަރު ނެރެފައިވާ ފިލްމުތައްވެސް ހުށަހަޅާފައި ވާއިރު އޭގެ ތެރޭގައި ކުރު ފިލްމަކާއި 12 ފީޗާ ފިލްމު ހިމެނެއެވެ.
ދިވެހި ފިލްމު އެވޯޑްގައި ބައިވެރިކުރި 12 ފިލްމުގެ ތެރެއިން އެންމެ މޮޅު ފީޗާ ފިލްމަކަށް ހޮވިފައި ވަނީ ވިޝްކާއެވެ. އެންމެ މޮޅު ފީޗާ ފިލްމަކަށް ވިޝްކާ ހޮވުނުއިރު އެ ފިލްމާ އެންމެ ގާތުން ވާދަކުރީ ދެވަންސޫރަ، ވަކިން ލޯބިން، އިލް ނޮއިސް އަދި ހައްދެވެ. ނުވަވަނަ ފިލްމު އެވޯޑްސްގެ އެންމެ މޮޅު ޑިރެކްޓަރުކަމާއި އެންމެ މޮޅު އެކްޓަރުގެ އެވޯޑު ޔޫސުފް ޝަފީއު (ޔޫއްޕެ) އަށް ލިބިފައި ވާއިރު އެންމެ މޮޅު ބަތަލާއަކަށް ހޮވިފައި ވަނީ އައިޝަތު ރިޝްމީއެވެ.
