މިއަދު ނިޔާވި މީހާ މޫދަށް ފުންމާލީ ސަކަރާތް ޖެހުމުގެ ތެރޭގައި ކަމަށް ފުލުހުން ބުނެފިއެވެ. ފުލުހުން ބުނީ 10 މީހުންނާއެކު ދަތުރު ކުރި ޑިންގީއިން ފުންމާލި ގ. މާލެހިޔާ 1، 13-2، 33 އަަހަރުގެ އަހުމަދު އަނީސް، ގުޅީފަޅު ބައްތިޔާ ދިމާ ބޭރަށް ފުންމާލީ ސަކަރާތް ޖެހުމުގެ ތެރޭގައި ކަމަށެވެ.
ފުލުހުން އެ މައްސަލަ ތަހުގީގު ކުރާތީ އިތުރު ތަފްސީލެއް ނުދެއެވެ. މިއަދު މެންދުރު ފަހު ހިނގި އެ ހާދިސާގައި 10 މީހުންނާއެކު ޑިންގީ ދަތުރު ކުރަމުން ދިޔައީ ތިލަފުއްޓަށް ދިއުމަށެވެ. އެމްއެންޑީއެފަށް އޭނާ އާ ގުޅޭ ރިޕޯޓު ލިބުމާއެކު އޭނާ ހޯދުމުގެ މަސައްކަތް ކުރަމުން ދަނިކޮށް މަރުވެފައިވާ މީހާގެ ހަށިގަނޑު ފެނުނީ ރިޕޯޓު ކުރިތާ ގަޑިއެއްހާ އިރު ފަހުން ހަވީރު 4:10 ހާއިރު އެވެ.
އެމީހާގެ ހަށިގަނޑު ފެނުނީ ކަނޑުގެ އަޑިން ކަމަށާ އޭނާ މާލެ ގެެނެސް މިއަދު ވަނީ އޭޑީކޭ ހޮސްޕިޓަލަށް ގެންގޮސްފައި ވާކަމަށް އެމްއެންޑީއެފުން ބުނެއެވެ.
އެމްއެންޑީއެފުން ބުނީ އޭނާގެ ހަށިގަނޑު ނެގީ 44 މީޓަރު އަޑިން ކަމަށެވެ.
