ކްރިމިނަލް ކޯޓު ހިންގެވުމާ ހަވާލުވެ ހުންނެވި ގާޒީ އަލީ ރަޝީދު ދިރިއުޅުއްވާ ގޭގެ ދޮރަށް ގެއްލުން ދީ، ގާޒީއަށް ބިރުދައްކާ، އިންޒާރުދިން މައްސަލަ ޖުޑިޝަލް ސާވިސް ކޮމިޝަން (ޖޭއެސްސީ)އިން ކުށްވެރިކޮށްފިއެވެ.
ޖޭއެސްސީން މިއަދު ނެރުނު ނޫސް ބަޔާނެއްގައި ބުނީ، ގާޒީ އަލީ ރަޝީދު އުޅުއްވާ ގޭގެ ދޮރަށް ގެއްލުންދީ، އޭނާއަށް އިންޒާރުދިން މައްސަލަ ހަރުކަށި އިބާރާތުން ކުށްވެރިކުރާ ކަމަށެވެ. އަދި އެ އަމަލު ހިންގި ފަރާތްތައް ހޯދާ ގާނޫނީގޮތުން އަޅަން ޖެހޭ ފިޔަވަޅުތައް އަވަސްކަމާއި އެކު އެޅުމަށް ކަމާ ބެހޭ މުއައްސަސާތަކަށް އެ ކޮމިޝަނުން ވަނީ ގޮވާލާފައެވެ.
ޖޭއެސްސީން ބުނީ، ގާޒީ އަލީ ރަޝީދާއި އޭނާގެ އާއިލާގެ ސަލާމަތާއި ރައްކާތެރިކަން ކަސަވަރުކުރުމަށްޓަކައި ކަމާބެހޭ ފަރާތްތަކުން ފިޔަވަޅު އަޅަމުންދާ ގޮތް މި ކޮމިޝަނުން ކައިރިން ބަލަމުންދާނެ ކަމަށެވެ.
ގާނޫނުއަސާސީއާ ހަވާލާދީ ޖޭއެސްސީން ބުނީ، ފަނޑިޔާރުންނަކީ ވަކިފަރާތަކަށް ބުރަނުވެ، ވަކިފަރާތަކުން ދައްކާފާނެ ބިރަކަށް ޖެހިލުންނުވެ، ތަޢައްސުބުން އެއްކިބާވެ ތިބެ، ގާނޫނުއަސާސީއާ ގާނޫނުތަކާ އެއްގޮތަށް ކަންތައްތައް ނިންމުންމަތީ ދެމިތިބެން ޖެހޭ ބައެއް ކަމަށެވެ. އެހެން ކަމުން ފަނޑިޔާރުންގެ މުސްތަގިއްލުކަމާއި މިނިވަން ކަމަށް އަސަރުކުރާފަދަ އަދި ފަނޑިޔާރުގޭގެ އިތުބާރާމެދު މުޖުތަމައުގައި ޝައްކާއި ވަހުމމު އުފެދޭފަދަ އަދި ޝަރުއީނިޒާމުގެ ހައިބަތާއި ގަދަރު ގެއްލޭފަދަ އެއްވެސް ކަމެއް އެއްވެސް ފަރާތަކުން ނުކުރުމަށް އެ ކޮމިޝަނުން ވަނީ އިލްތިމާސްކޮށްފައެވެ.
މީގެ އިތުރުން ޖޭއެސްސީން ބުނީ، ފަނޑިޔާރުން އަދާކުރަމުންދާ ދޫސްތޫރީ އަދި ޝަރުއީ މަތުވެރި ޒިންމާ އަދާކުރުމަށް އެކިފަރާތްތަކުން ކުރިމަތިކުރާ ނުރައްކާތެރި ނުފޫޒުތަކާއި ބިރުވެރި ހަމަލާތަކުން ފަނޑިޔާރުންނާއި މުޅި ޝަރުއީ ނިޒާމު ސަލާމަތް ކުރަން ޖެހޭ ކަމަށެވެ. އަދި ފަނޑިޔާރުންނަށް ރައްކާތެރި ވެއްޓެއް ގާއިމުކޮށް ދިނުމަށްޓަކައި ހާއްސަ އަހައްމިއްޔަތު ކަމމެއް ދީގެން އެ ކޮމިޝަނުން ކުރާ މަސައްކަތް އެގޮތުގައި ކުރަމުންދާނެ ކަމަށް ޖޭއެސްސީން ބުނެއެވެ.
ސަރުކާރުބަޔަކު ހެދި ހިންތާ އެއް