ކްރިމިނަލް ކޯޓު ހިންގެވުމާ ހަވާލުވެ ހުންނެވި ގާޒީ އަލީ ރަޝީދު ދިރިއުޅުއްވާ ގޭގެ ދޮރަށް ރޭ ގެއްލުން ދީފިއެވެ.
މި ހާދިސާއާ ގުޅިގެން ފުލުހުން ބުނީ، ގާޒީ އަލީ ރަޝީދު ދިރިއުޅުއްވާ ފްލެޓްގެ ބޭރު ދޮރަށް ގެއްލުން ދީ ލިޔުމެއް ލިޔެފައި ވާ މައްސަލައެއް ރޭ ފަތިހު 5:30 ހާއިރު ފުލުހުންނަށް ހުށަހަޅާފައި ވާ ކަމަށެވެ.
ފުލުހުން ބުނީ، ދޮރަށް ގެއްލުން ދިނުމަށް ބޭނުންކުރި ހަތިޔާރު ކަމަށް ބެލެވޭ ކޯރާޑިއެއް ދޮރު ކައިރިން ފެނިފައި ވާ ކަމަށެވެ.
މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާއިރު، މި މައްސަލަ އާއި ގުޅިގެން އަޅަން ޖެހޭ ފިޔަވަޅުތަށް އަޅައި، ފުލުހުން ގެންދަނީ މި މައްސަލަ ތަހުގީގު ކުރަމުން ކަމަށް ފުލުހުން ބުނެއެވެ.
ގަޒީ އަލީ ރަޝީދު އުޅުއްވާ ފްލެޓްގެ ދޮރަށް ބަޔަކު ގެއްލުން ދީފައިވާއިރު، ސުޕްރީމް ކޯޓުގެ ފަނޑިޔާރަކާ ހަވާލާދީ ބައެއް މީޑިއާތަކުގައި ރޭ ވަނީ ގޮތް ނޭނގޭ ބަޔަކު އުއްތަމަފަނޑިޔާރުގެ ގެކޮޅަށް ވަންނަން އުޅުނު ކަމަށް ރިޕޯޓްކޮށްފައިވެއެވެ. ނަމަވެސް މި މައްސަލަ ފުލުހުންނަށް ރިޕޯޓު ކޮށްފައި ނުވާ ކަމަށް ފުލުހުން ބުނެފައިވާއިރު، ޖޭއެސްސީން ވަނީ އުއްތަމަފަނޑިޔާރާ ނޯޓިސް ހަވާލު ކުރުމަށް ރޭ ޖޭއެސްސީގެ މުވައްޒަފަކު ދިޔަ ކަމަށް ބުނެފައެވެ. އަދި އެ ނޯޓިސްއާ އުއްތަމަފަނޑިޔާރު ހަވާލުވެވަޑައިގަތުމަށް ދެކޮޅު ހެއްދެވި ކަމަށްވެސް ޖޭއެސްސީން ބުނެެފައިވެއެވެ.
