ސުޕްރީމް ކޯޓުގެ ފަނޑިޔާރު އާދަމް މުހައްމަދު އަބްދުﷲގެ މައްސަލައިގެ ތަހުގީގުގެ އަޑުއެހުން އާންމުންނަށް ހުޅުވާލައިގެން މާދާމާ ބޭއްވުމަށް ހަމަޖައްސައިފިއެވެ.
ޖުޑިޝަލް ސާވިސް ކޮމިޝަން (ޖޭއެސްސީ) އިން ބުނީ، ސުޕްރީމް ކޯޓުގެ ފަނޑިޔާރު އާދަމް މުހައްމަދު އަބްދުﷲގެ ތަހުގީގުގެ އަޑުއެހުން މާދަމާ މެންދުރު ފަހު 3:00 ގައި އެ ކޮމިޝަނުގައި ބޭއްވުމަށް ހަމަޖެހިފައިވާ ކަމަށެވެ. މި އަޑުއެހުމަކީ ފަނޑިޔާރު އާދަމް މުހައްމަދުގެ އެދިވަޑައިގަތުމުގެ މަތިން އާންމުކޮށް ހުޅުވާލައިގެން ކުރިއަށް ގެންދެވޭ އަޑުއެހުމެކެވެ.
މި އަޑުއެހުމަށް ވަނުމަށް އާންމުން އަދި މީޑިއާތަަކަށް ޖާގަ އޮތް މިންވަރަކުން ފުރުސަތު ދެވޭނެ ކަމަށް ޖޭއެސްސީން ބުނެއެވެ. އަދި މިއަޑުއެހުމަށް ވަންނަ ފަރާތްތަކުން އައިޑީކާޑު ގެންދިއުމަށާއި ގަޑި ޖެހުމުގެ 15 މިނެޓު ކުރިން ދިއުމަށް އެ ކޮމިޝަނުން އިލްތިމާސްކުރެއެވެ.
މި މަހުގެ 4 ވަނަ ދުވަހަށް އެންމެ ފަހުން ތާވަލްކުރި އަޑުއެހުން ފަސްކުރެވިފައި ވަނީ އޭނާ ރާއްޖެއިން ބޭރަށް ފުރާވަޑައިގަތުމުންނެވެ. އެއީ އަޑުއެހުން ފަސްކުރި 4 ވަނަ ފަހަރެށެވެ.
