އަނިޔާވެރި ކުށްތައް މަދުކުރެވުމުން ކޮމިޝަނާ އޮފް ޕޮލިސް، މުހައްމަދު ހަމީދު ފުލުހުންނަށް ތައުރީފު ކުރައްވައިފިއެވެ.
ސީޕީ ވިދާޅުވީ، ގްރޫޕު ހަދައިގެން ނުވަތަ ރާވައިގެން ހިންގާ އަނިޔާވެރި އަމަލުތައް ވަރަށް ބޮޑުތަނުން މަދުކުރެވިފައި މިވަނީ މަގުތަކުގެ އަމާންކަން ދެމެހެއްޓުމަށް ތަރުތީބާއި ރަނގަޅު އިންތިޒާމް ތަކުގެ ތެރެއިން ފުލުހުން ކުރަމުން އަންނަ މަސައްކަތް ވެސް ހިމެނިގެން ކަމަށެވެ. މިހެން ވިދާޅުވެ، ސީޕީ ވަނީ ހުރިހާ ފުލުހުންނަށް މަރުހަބާ ދަންނަވާފައެވެ.
ގްރޫޕު މާރާމާރީގެ މިދިޔަ 6 އަހަރުގެ ތަފާސް ހިސާބުތައް:
- 2014 - 269
- 2015 - 203
- 2016 - 216
- 2017 - 219
- 2018 - 222
- 2019 - 110
ސީޕީ މިހެން ވިދާޅުވެފައި ވާއިރު ވޭތުވެދިޔަ 6 އަހަރުގެ ޕޮލިސް ރެކޯޑްތަކުން ދައްކާ ގޮތުގައި އަނިޔާވެރި ކުށްތައް، އެންމެ މަދުން ހިނގީ މި އަހަރު ކަމަށާއި، ގުރޫޕު މާރާމާރީގެ އަދަދު މިދިޔަ އަހަރަށް ވުރެ 50 ޕަސެންޓް މަދުވެފައިވާ ކަން ރައީސް އިބްރާހިމް މުހައްމަދު ސޯލިހް ވަނީ ރޭ އިއުލާން ކުރައްވާފައެވެ. އެގޮތުން މިދިޔަ 6 އަހަރުގެ ތެރޭގައި ގޭންގް ކުށްތަކުގައި، މާލޭގެ މަގުތަކުގައި 21 މީހަކު މަރާލެވިފައިވާ ކަމަށާއި، ނަމަވެސް ގޭންގް ކުށްތަކުގައި، މިއަހަރު އެންމެ މީހެއްގެ ފުރާނަވެސް ގެއްލިފައިނުވާ ކަމަށް ރައީސް ވަނީ ވިދާޅުވެފައެވެ. އޭގެ ތެރެއިން 2014 ވަނަ އަހަރު 4 މީހުން، 2015 ވަނަ އަހަރު 7 މީހުން، 2016 ވަނަ އަހަރު 3 މީހުން އަދި 2017 ވަނަ އަހަރު 5 މީހުންގެ އިތުރުން މިދިޔަ އަހަރު ދެ މީހަކު މަރާލާފައިވާ ކަމަށް ފުލުހުންގެ ތަފާސް ހިސާބުތަކުން ދައްކައެވެ.
ރޭގެ ޖަލްސާގައި ރައީސް ސޯލިހް ވިދާޅުވީ، އަނިޔާވެރި ކުށްތައް މަދުކުރެވުމަކީ ދާހިލީ ސުލްހަމަސަލަސްކަން ގާއިމު ކުރުމުގައި، ދިވެހި ފުލުހުން ކުރަމުން އަންނަ ވަރަށް ބުރަ މަސައްކަތްތަކެއްގެ ނަތީޖާ ކަމަށެވެ. އަދި އެކަމަށްޓަކައި ދިވެހި ފުލުހުންނަށް ހާއްސަ ޝުކުރެއް ދަންނަވަމުން ރައީސް ވަނީ މާލޭގެ މަގުތަކުގެ އަމާންކަން ދަމަހައްޓައި، ސުލްހަވެރިކަން ގާއިމުކުރުމަށް އަދިވެސް ގިނަ މަސައްކަތްތަކެއް ކުރަން ޖެހޭނެ ކަން ފާހަގަ ކުރައްވާފައެވެ.
އަނިޔާވެރި ކުށްތައް މަދުކުރެވުނު! ދީނަށް ފުރަށްސާރަ ކުރުން އިތުރު ކުރެވުނު! ހަމީދު ސީޕީ ގެ ހުރިހައި ޝުކުރެއް އެކަމުގެ ވާގިވެރިންނަށް!