ޓީޗަރުންގެ މުސާރައާ ބެހޭގޮތުން ސުވާލުކުރުމަށް މާދަމާ އެޑިއުކޭޝަން މިނިސްޓަރު ޑރ. އައިޝަތު އަލީ ރައްޔިތުންގެ މަޖިލީހަށް ހާޒިރުކުރުމަށް އެޖެންޑާ ކޮށްފިއެވެ.
މާދަމާގެ ޖަލްސާގައި އެޑިއުކޭޝަން މިނިސްޓަރާ ސުވާލު ކުރެއްވުމަށް ހުށަހެޅުއްވީ ދާންދޫ ދާއިރާގެ މެންބަރު ޔައުގޫބު އަބްދުﷲއެވެ. އެގޮތުން ސުވާލު ހުށަހަޅުއްވަމުން ޔައުގޫބް ވަނީ ކުރީ ސަރުކާރުތަކުން އެކަށީގެންވާ ސަމާލުކަމެއް ނުދެވި އޮތުމުން ތައުލީމީ ދާއިރާ އާއި ޓީޗަރުންގެ ހާލަތު ވަރަށް ބޮޑަށް ދަށަށް ގޮސްފައިވާ ކަން ފާހަގަ ކުރައްވާފައެވެ.
ޔައުގޫބު ހުށަހަޅާފައިވާ ސުވާލުތަކުގެ ތެރޭގައި، ޓީޗަރުންގެ މުސާރައަށް ހެޔޮ ބަދަލެއް ގެނެވޭނީ ކިހާއިރަކުންތޯ އަދި މިިދޔަ 12 ވަރަކަށް އަހަރު ތެރޭގައި ސްކޫލު ނިންމި މޮޅެތި ދަރިވަރުން ކިޔަވައިދިނުމުގެ ދާއިރާއާ ދުރަށްދާކަން ފާހަގަ ކުރެވިފައިވާ ކަމަށާއި، މިހެން މިކަން ދިމާވަނީ ކީއްވެތޯއާ އެކަން ހައްލުކުރަން މިނިސްޓްރީން ކުރައްވާ މަސައްކަތްތަކަކީ ކޮބައިތޯ ހިމެނެއެވެ.
މިދިޔަ އޮގަސްޓް މަހު އެޑިއުކޭޝަން މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން، އެޑިއުކޭޝަން މިނިސްޓަރު ވަނީ މުސާރަ ބޮޑުކުރުމަށް ރައީސް އޮފީހާ ގުޅިގެން ޓީޗަރުންނަށް މުސާރަ ދިނުމާ ގުޅޭ އޮނިގަނޑުތަކަށް މިހާރު ބަދަލުތަކެއް ގެންނަވާފައިވާ ކަން ހާމަ ކުރައްވާފައެވެ. އަދި ޓީޗަރުންގެ މުސާރައިގެ އިތުރުން އޯވާ ޓައިމްގެ އުސޫލަށް ވެސް ބަދަލުތަކެއް ގެނައުމަށް މަސައްކަތް ކުރައްވަމުންދާ ކަމަށް ވެސް މިނިސްޓަރު ވަނީ ވިދާޅުވެފައެވެ.
މިކަމާ ބެހޭ އިތުރު ތަފްސީލެއް އެޑިއުކޭޝަން މިނިސްޓްރީން ހާމަކޮށްފައި ނުވާއިރު، އެޑިއުކޭޝަން މިނިސްޓަރު ވިދާޅުވީ ވަރަށް އަވަސް މުސްތަގުބަލެއްގައި އާ އޮނިގަނޑު ހާމަކުރައްވާނެ ކަމަށް ވިދާޅުވެފައެވެ.
ޓީޗަރުންގެ އުޖޫރުއަށް ހެޔޮ ބަދަލެއް ގެނައުމަކީ ރައީސް އިބްރާހިމް މުހައްމަދު ސާލިހުގެ ރިޔާސީ ވައުދުފުޅެކެވެ.
