ދިވެހިރާއްޖޭގެ ކޯޓުތަކުގެ ހުކުމް "ޕްރިންޓް" ވެގެން އަންނަނީ ކެނެރީގެއިން ކަމަށް ވާން ޖާގަ ނުދެއްވޭނެކަމަށް ޕީއެންސީގެ ނައިބު ރައީސް ބާރަށު ދާއިރާގެ މެންބަރު އިބްރާހިމް ޝުޖާއު ވިދާޅުވެއްޖެއެވެ.
އިދިކޮޅު ކޯލިޝަނުން މިރޭ ކުރިއަށް ގެންދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޝުޖާއު ވިދާޅުވީ، ކޯޓުތަކުން ނިންމާ ނިންމުން ނުވަތަ ކޯޓުތަކުން ކަނޑައަޅާ ހުކުމް "ޕްރިންޓް" ވެގެން އަންނަ ތަނަކަށް ކެނެރީގެ ވުމަށް ޖާގައެއް ނުދެއްވޭނެ ކަމަށާއި އެފަދައިން އެކަން ވާން ދިވެހި އެއްވެސް ރައްޔިތަކު ބޭނުން ނުވާނެ ކަމަށެވެ.
ޝުޖާއު ވިދާޅުވީ، ޕީޕީއެމްއަކީ ނުވަތަ މި ކޯލިޝަނަކީ ހަމައެކަނި ޕްރެސް ކޮންފަރެންސް ބާއްވާ ކާނިވަލުގައި ޖަލްސާ ބާއްވާނެ ބައެއް ކަމަށް މި ސަރުކާރާއި ޖުޑިޝަލް ސާވިސް ކޮމިޝަން (ޖޭއެސްސީ) އިންވެސް ހީކޮށްގެން ނުވާނެ ކަމަށެވެ.
އަދި މިހާރު ކަންތައް މާ މައްޗަށް ދާ ކަމަށް ވިދާޅުވެ ޝުޖާއު ވިދާޅުވީ މަގުމަތީގައި މުޒާހަރާ ކުރަން ޖެހޭ ހިސާބަށް މިހާރު ސަރުކާރުގެ އަމަލުތައް ގޮސްފައިވާ ކަމަށެވެ. މިހެން ކަންތައް ވާނަމަ މަގު މައްޗަށް ނުކުންނަވަން ޖެހިވަޑައިގެންފާނެ ކަމަށާއި ނުކުންނަވައިފިއްޔާ ދެން ކަންތައް ވާނެ ގޮތް ހިތްތަކަށް ގެންނަން އެބަޖެހޭ ކަމަށް ޝުޖާއު ވިދާޅުވިއެވެ.
ރައްޔިތުން މަޖިލީހުގެ ރައީސް ޖުޑީޝަލް ސާވިސް ކަމިޝަންގައި އިންނަވާ ކަމަށް ވިދާޅުވަމުން ޝުޖާއު ވިދާޅުވީ، ކޯޓުތަކުގައި ހިނގާ މައްސަލަތަކުގެ ތެރެއަށް ސީދާ ރައީސް ނަޝީދު ނުފޫޒު ފޯރުއްވާ ކަމަށާއި އެ މައުލޫމާތު އިދިކޮޅު ކޯލިޝަނަށް ލިބިފައި އެބަހުރި ކަމަށެވެ. ރައީސް ނަޝީދު މެސެޖުގެ ޒަރީއާއިން ހުކުމްގެ ތެރެއަށް ވަންނަވައި މައްސަލަ ނިންމަވާފައި ހުރިކަމަށް ޝުޖާއު ވިދާޅުވިއެވެ.
މީގެ އިތުރުން، ޝުޖާއު ވިދާޅުވީ، ޕީޕީއެމްގެ ވެރިކަމުގައި ޖުޑިޝަރީއަށް އެ ސަރުކާރުން އަތް ބާނާކަމަަށް އެމްޑީޕީން ތުހުމަތު ކޮށްފައިވާ ކަމަށާއި، ނަމަވެސް މިއަދު ރައީސް ނަޝީދާއި ޖޭއެސްސީގައި ތިއްބެވި އެހެން ބައެއް ބޭފުޅުންވެސް ގެންދަވަނީ، ނުފޫޒު ފޯރުއްވައި މެސެޖު ފޮނުއްވަމުން ކަމަށް ޝުޖާއު ވިދާޅުވިއެވެ.
ޝުޖާއު ވަނީ މިރޭ ޖޭއެސްސީން ނެރުނު ބަޔާނާ ގުޅިގެންވެސް ވާހަކަ ދައްކަވާފައެވެ. އޭނާ ވިދާޅުވީ ސުޕްރީމް ކޯޓުން ނިންމާ ނިންމުމެއް ބެލޭނެ އެއްވެސް ގާނޫނީ ހުއްޖަތެއް ނުވަތަ ނިޒާމުގެ ތެރެއިން އެ ނިންމުމެއް ބެލުމުގެ އެއްވެސް އިހްތިޔާރެއް ޖޭއެސްސީއަށް ލިބިގެން ނުވާ ކަމަށެވެ.
އިދިކޮޅު ކޯލިޝަނުން މިރޭ ނޫސްވެރިންގެ ބައްދަލުވުމެއް ބާއްވާފައި ވާއިރު މިރޭ ޖުޑީޝަލް ސާވިސް ކޮމިޝަން (ޖޭއެސްސީ) އިން ވަނީ ހަގީގަތް އޮޅޭގޮތަށް ބަޔާނެއް ނެރުއްވާފައި ވާތީ، އުއްތަމަ ފަނޑިޔާރު ޑރ. އަހްމަދު އަބްދުﷲ ދީދީގެ އިތުރު ސުލޫކީ މައްސަލައެއް ބަލަން ނިންމާފައިވާ ކަމަށް ބުނެފައެވެ.
އެމީހުން އެހުރީ ގަލޮޅު އޮފީސް ކެނެރީގޭގައި ހަދާފައި !