ހުރިހާ ވަސީލަތަކާއި ހިދުމަތެއް މާލެއަށް ޖަމާކޮށްގެން ކުރަމުންދާ "ރަސްކަން" ހުއްޓުވާލަން ވިލިނގިލި ދާއިރާގެ މެންބަރު ސައުދު ހުސައިން ގޮވާލައްވައިފިއެވެ.
މިއަދު ސައުދު ކުރެއްވި ޓްވީޓެއްގައި ވިދާޅުވީ، މާލެއަށް ދިމާވެފައިވާ ދަތި އުނދަގޫތަކަށް ހައްލު ގެނެވޭނީ ރާއްޖޭގެ ރައްޔިތުން މާލެ ނޫން ހައްލެއް ހޯދައިގެން ކަމަށެވެ. އަދި ހުރިހާ ވަސީލަތަކާއި ހިދުމަތެއް މާލެއަށް ޖަމާކޮށްގެން މި ކުރަމުންދާ "ރަސްކަން" ހުއްޓާލައި، އަތޮޅުތަކުގައި ވަސީލަތްތައް ގާއިމް ކުރަންޖެހޭ ކަމަށް އޭނާ ވިދާޅުވިއެވެ.
ސައުދު މިފަދައިން ޓްވީޓް ކުރައްވައިފައިވާ އިރު މިއަދު މަޖިލީހުގައި ވަނީ ދިވެހި ރައްޔިތުންނަށް މާލެއާއި ރަށްރަށުން ފްލެޓް ދޫކުރުމަށް ހޯރަފުށީ ދާއިރާގެ މެންބަރު އަހުމަދު ސަލީމް މަޖިލީހަށް ހުށަހަޅުއްވާފައިވާ ގަރާރުގެ އިބްތިދާއީ ބަހުސްގައި މެންބަރުން ވާހަކަ ދައްކަވާފައެވެ. މިއަދުގެ ބަހުސްގައި ވާހަކަ ދައްކަވަމުން އެތައް މެންބަރުންނެއް ވަނީ މާލޭގައި ތޮށްޖެހުން ކުޑަކުރަން ޖެހޭ ކަމަށް ވާހަކަ ދައްކާ މާލޭގެ ރައްޔިތުންނަށް ހުރި ގެދޮރުގެ ދަތިކަމުގެ ވާހަކަތައް ހިއްސާކުރައްވާފައެވެ. މީގެ އިތުރުން ބައެއް މެންބަރުން ވަނީ މާލެ ތޮށް ޖެއްސުމަށް ރާއްޖެތެރެއިން ރައްޔިތުން މާލެއަށް އަންނަނީ އެނޫން ގޮތެއް ނެތިގެން ކަމަށް ވިދާޅުވެ ވާހަކަ ދައްކަވާފައެވެ.
މިއަދުގެ ބަހުސަށް ވާހަކަ ދައްކަވަމުން ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމް ވިދާޅުވީ، މާލޭ މީހަކަށް ވެ ހުރެ އަމިއްލަ ރަށުގައި ވަންނާނެ ތަނެއް ނެތް މީހުން ގިނަ ކަމަށެވެ. އަދި އަމިއްލަ ގެދޮރުގައި އެމީހާ އުޅެން ޖެހެނީ ކުއްޔަށް ކަމަށާއި އާއިލާގެ މެންބަރުންގެ ގޯތި ބައިބައި ކުރަމުން ގޮސް ވަންނާނެ ތަނެއް ނޯންނަ ކަމަށް އޭނާ ވިދާޅުވިއެވެ.
ކެޔޮދޫ ދާއިރާގެ އެމްޑީޕީގެ މެންބަރު ހުސެއިން ގާސިމް ވިދާޅުވީ ރަށްރަށުގެ މީހުން މާލެ އައިސް އުޅެނީ ރާއްޖެތެރޭގައި ވަސީލަތް ނެތުމުން ކަމަށާއި ކޮންމެހެން ފަސޭހަވެގެން ނޫން ކަމަށެވެ. އެގޮތުން ރަށްރަށުގައި ސިއްހީ މަރުކަޒާއި ހޮސްޕިޓަލްތަކެއް އަޅާފައި ހުއްޓަސް، ހިދުމަތްތަކެއް ނުލިބޭތީ ބަލިވީމާ މާލެއަށް އަންނަން ޖެހެނީ ކަމަށް އޭނާ ވިދާޅުވިއެވެ.
މިއަދުގެ ޖަލްސާގައި ވާހަކަ ދައްކަވަމުން ސައުދު ވިދާޅުވީ، މާލެއަށް ގިނަ މީހުން އަންނަން ޖެހުނީ ތައުލީމީ ދާއިރާ، ސިއްހީ ދާއިރާ އަދި އިގްތިސޯދީ ދާއިރާގެ ފުރުސަތައް މާލެއަށް ޖަމާކުރުމުގެ ސަބަބުން ކަމަށެވެ. އެހެންވެ، ރަށްރަށުގައި ވަޒީފާގެ ފުރުސަތުތައް ތަނަވަސްކޮށްދީ، ސިއްހީ، ތައުލީމީ ދާއިރާގެ ހާލަތު ރަނގަޅު ކުރަން ޖެހޭ ކަމަށް ސައުދު ވިދާޅުވިއެވެ.
އަދި ރާއްޖޭގެ ރަށްތަކުގައި ދިރިއުޅޭ މީހުން ތިބީ މާލެ ނޫން ގޮތެއް ހޯދަން ބޭނުންވެފައި ކަމަށް ވެސް ސައުދު ވިދާޅުވިއެވެ.
