އިންފޮމޭޝަން ކަމިޝަނަރުގެ މަގާމަށް އައްޔަންކުރުމަށް ރައީސް އިބްރާހިމް މުހައްމަދު ސޯލިހް މަޖިލީހަށް ފޮނުއްވި 9 ނަމުގެ ތެރެއިން 3 ނަމެއް މަޖިލީހުގެ ތަޅުމަށް ފޮނުވުމަށް މިނިވަން މުއައްސަސާތަކުގެ ކޮމިޓީން ފާސްކޮށްފިއެވެ.
އިންފޮމޭޝަން ކަމިޝަނަރުގެ މަޤާމަށް އައްޔަންކުރެއްވުމަށް ރައީސް ވަނީ 9 ފަރާތެއްގެ ނަން މަޖިލީހަށް ފޮނުއްވާފައެވެ. މި ފަރާތްތަކުގެ ތެރެއިން މިނިވަން މުއައްސަސާތަކުގެ ކޮމެޓީން 3 ނަމެއް މަޖިލީހުގެ ތަޅުމަށް ފޮނުވުމަށް ފާސްކުރީ، ރައީސް އިސްކަންދެއްވާފައިވާ 4 ފަރާތަކާ އިންޓަވިއު ކުރުމަށްފަހުއެވެ.
ރައީސް އިސްކަންދެއްވާފައިވާ ހަތަރު ފަރާތަކީ، ހުސެއިން ފިޔާޒު މޫސާ އާއި އަހުމަދު ފަޔާޒާއި، އަހުމަދު އާހިދު ރަޝީދުގެ އިތުރުން ފާތިމަތު ސައުޝަން އެވެ. މި ހަތަރު ފަރާތުގެ ތެރެއިން ޝައުޝަންގެ ނަން ފިޔަވާ ދެން އޮތް ތިން ނަން މަޖިލީހުގެ ތަޅުމަށް ފޮނުވަން ފާސްކުރީ ކޮމެޓީގައި ބައިވެރިވެޑައިގެން 9 މެންބަރުންގެ ވޯޓުންނެވެ.
މި ތިން ނަމަށް މަޖިލީހުގައި ޖަލްސާގައި ވޯޓަށް އަހާނެއެވެ. އިންފޮމޭޝަން ކޮމިޝަނަރު ކަމަށް އައްޔަންކުރާނީ މަޖިލީހުގެ ތަޅުމުން އެންމެ ގިނަ ވޯޓް ލިބިވަޑައިގަންނަވާ ފަރާތަކަށެވެ.
ކުރިން އެ މަގާމުގައި ހުންނެވި އަބްދުލްއަޒީޒް ޖަމާލް އަބޫބަކުރުގެ ދައުރު މިއަހަރުގެ ޖުލައި މަހުގެ 22 ވަނަ ދުވަހު ހަމަވެފައިވާތީ އެ މަގާމް ވަނީ މިހާރު ހުސްވެފައެވެ. މިއަދާ ހަމައަށް އެ މަގާމު ހުސްވެފައި އޮންނަތާ 76 ދުވަސް ހަމަވެފައިވާއިރު، މި މަގާމް ހުސްވާތާ 60 ދުވަހުގެ ތެރޭގައި އެ މަގާމަށް މީހަކު އައްޔަން ކުރަންޖެހޭ ކަމަށް މައުލޫމާތު ހޯދައި ލިބިގަތުމުގެ ގާނޫނުގައި ބަޔާންކޮށްފައި ވެއެވެ.
