އިމިގްރޭޝަންގެ ބެލުމުގެ ދަށަށް ގެންގޮސްފައިވާ ޔަމަން މީހެއް ކަމަށްވާ ޔާސިރު ޔަހުޔާއަކީ ޓެރަރިޒަމާ ގުޅުން ހުރި މީހެއް ކަމުގެ މައުލޫމާތު ލިބިފައިވާ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި މިނިސްޓަރު އިމްރަން އަދި ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވީ، ޔާސިރާއި ޓެރަރިޒަމާ ގުޅުން ހުރިކަން ފުލުހުންނަށް އެނގިފައިވާ ކަމަށާއި، އޭނާ އަކީ އެހެން ގައުމުތަކުގައި ވެސް މިފަދަ އަމަލުތަކުގެ ސަބަބުން ހައްޔަރު ކޮށްފައިވާ މީހެއް ކަމަށެެވެ. އަދި ބައިނަލްއަގުވާމީ މީޑިއާގައި ވެސް މިދަފަ ހެކިތައް ފެންނަން އެބަހުރި ކަމަށާއި އޭނާއާ ބެހޭ މައުލޫމާތު ފުލުހުންނަށް ލިބި އިމިގްރޭޝަނަން އެންގުމުން ކޮންޓްރޯލާ އަށް ލިބިވަޑައިގެންފައިވާ ބާރުގެ ދަށުން، ޔާސިރު ރާއްޖެ ދޫކޮށް ދާން އެންގުމުން ޕާސްޕޯޓް ފޮރުވައި، ފުރައިގެން ދާން އޭނާ އިންކާރުކޮށްފައިވާ ކަމަށް މިނިސްޓަރު ވިދާޅުވިއެވެ.
މިނިސްޓަރު އިމްރާން ވިދާޅުވީ، ޔާސިރު 2017 ވަނަ އަހަރުން ފެށިގެން ވެސް ކަރެކްޝަންގެ ބެލުމުގެ ދަށުގައި ހުންނަނީ އޭނަގެ އަމިއްލަ އިހްތިޔާރުގައި ކަމަށާއި ފުރައިގެން ދާން ބޭނުންވާ ނަމަ މިހާރުވެސް އެކަން ފަހިކޮށްދޭނެ ކަމަށެވެ.
މިނިސްޓަރު އިމްރާން ވިދާޅުވީ، ޔާސިރު ދޫކޮށް ނުލެވިގެން އުޅެނީ އޭނާ ފޮނުވާލަނެ ގޮތެއް ނެތިގެން ކަމަށެވެ. އެއީ އޭނާ ނިސްބަތްވާ ޔަމަނުން މިހާރު ޓްރެވެލް ޑޮކިއުމެންޓެއް ވެސް ހެއްދެން ނެތުމާއި، އެކު އޭނާގެ ޕާސްޕޯޓް ނެތުމުން ކަމަށް މިނިސްޓަރު އިމްރާން ވިދާޅުވިއެވެ. އަދި އޭނާގެ ޕާސްޕޯޓް ވީތަނެއް އޭނައަށް އެނގޭ ކަމަށާއި، އޭނާގެ ޕާސްޕޯޓް އޭނާ ފޮރުވައިގެންް އުޅޭ ކަމަށް ވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، ޔާސިރު ރާއްޖެއަށް އެތެރެ ވިއިރުވެސް އޭނާއާ ބެހޭ މައުލޫމާތުތައް ފުލުހުންނަށް ލިބިފަިއވާ ކަމަށާއި، ނަމަވެސް އޭރު އޭނާ ރާއްޖެ އެތެރެވުން ހުއްޓުވުމަށް ގާނޫނުން ކުރެވެން އޮތް ކަމެއް ނެތް ކަމަށެވެ. އަދި އޭނާ މާލޭގައި ހުރެގެން ވެސް ކަންކަން ކުރާ ކަމަށާއި، މީހުންނާއި މުއާމަލާތްކޮށް ވެސް ހަދާ ކަމަށް މިނިސްޓަރު އިމްރާން ވިދާޅުވިއެވެ.
ޔާސިރަކީ ރާއްޖެއަށް ހުރި ނުރައްކަލެއް ކަމަށް ނިމުމާއި އެކު ކުރީ ސަރުކާރުން އޭނާ ހައްޔަރުކޮށް، ރާއްޖެއިން ފުރައިގެން ދިއުމަށް އެންގި ކަމަށް މިނިސްޓަރު އިމްރާން ވިދާޅުވިއެވެ. އަދި އޭނާ އެކަމަށް އިންކާރު ކުރުމުން އޭނާގެ ވިސާ ކެންސަލްކޮށް، އޭނާ ހައްޔަރުގައި ބެހެއްޓީ ކަމަށް ވެސް އިމްރާން ވިދާޅުވިއެވެ. ޔާސިރަކީ ދުނިޔެއިން ބޮޑު ޓެރަރިސްޓެއްކަމަށް ބަލާ މީހެއް ކަން ފާހަގަ ކުރައްވާ އިމްރާން ވިދާޅުވީ، މި ދަރަޖައިގެ މީހަކު މުޖުތަމައުގެ ތެރެއަށް ދޫކޮށްލާފައި ހުރުމަކީ ރައްކާތެރިކަމެއް ކަމަށްގަބޫލު ނުކުރައްވާ ކަމަށެވެ.
