މާލޭ ޓީ ޖެޓީ ސަރަހައްދުގައި މިއަދު ހިނގި އަލިފާނުގެ ހާދިސާގައި، 4 ތެޔޮ ބައުޒަރު އެއްކޮށް އަނދައިގެން ދިޔަ އިރު 9 ވެހިކަލަކަށް އެކިވަރުގެ ގެއްލުން ވެފައި ވާކަމަށް ފުލުހުން ބުނެފިއެވެ. އެއްކޮށް އަނދައިގެން ދިޔަ ތެޔޮ ބައުޒަރުތަކުގެ އިތުރުން، އިތުރު 3 ބައުޒަރެއްގެ އެއްފަޅި އެއްކޮށް ބޭނުން ނުކުރެވޭ ވަރަށް ވަނީ ގެއްލުން ވެފައެވެ.
މިއަދު އަނދައިގެން ދިޔަ ތެޔޮ ބައުޒަރުތަކުގެ ތެރެއިން އެއް ބައުޒަރެއްގެ ވެރި ފަރާތުން ބުނީ، އޭނާގެ ކުންފުނި އެޗްއެމްއެޗްއައިގެ 2 ބައުޒަރު އެއްކޮށް އަނދައިގެން ދިޔަ އިރު، އިތުރު ބައުޒަރަކަށް ބޭނުން ނުކުރެވޭ ވަރަށް ގެއްލުން ވެފައި ވާކަމަށެވެ.
"4 ބައުޒަރެއް ނޫން އަނދައިގެން އުޅެނީ، އެހެރީ މަގޭ ބައުޒަރުތައް، އެކަތި އެއޮތީ ކުރުނބާ ގާޑިޔާތައް ކުރިމަތީ، ޓޭންކް އެކަނި ލިބުނީ" އެޗްއެމްއެޗްއައި ގެ ވެރިފަރާތުން ބުންޏެވެ.
އެޗްއެމްއެޗްއައި ގެ ބައުޒަރު ތަކުގެ އިތުރުން މިއަދު އެނދި ބައުޒަރުތަކުގެ ތެރޭގައި ހިމެނެނީ، މެރީޑިއަމްގެ 2 ބައުޒަރަކާއި ފިއުލް އެކްސް ޕްރެސްގެ ބައުޒަރެކެވެ. މީގެ ތެރެއިން މެރީޑިއަމް ގެ 1 ބައުޒަރުން ވެސް ސަލާމަތްވެފައި ވަނީ ޓޭންކު އެކަންޏެވެ.
ފުލުހުން ބުނީ މިއަދުގެ އަލިފާނުގެ ހާދިސާގައި އެއްފަޅި އަށް ގެއްލުންވި އުޅަނދު ތަކުގެ ތެރޭގައި 5 ޕިކަޕާއި 3 ބައުޒަރާއި 1 ޓެކްސީ ހިމެނޭ ކަމަށެވެ.
މިއަދުގެ އަލިފާނުގެ ހާދިސާގައި ފުރަތަމަ އަލިފާން ރޯވި ލޯންޗް ވަނީ ބޭނުން ނުކުރެވޭ ވަރަށް އަނދާފައެވެ. އެ ލޯންޗަކީ މާލެއާއި އއ އަތޮޅާ ދެމެދު ދަތުރު ކުރާ "ނެވި-3" ނަމަކަށް ކިޔާ ލޯންޗެކެވެ. ލޯންޗުގެ ވެރި ފަރާތާއި ހަވާލާދީ ބައެއް މީޑިއާ ރިޕޯޓުތަކުގައި ބުނެފައި ހުރީ އަލިފާން ރޯވީ ތެޔޮއަޅާ ނިމި ލޯންޗުގެ މަރާމާތެއްގެ މަސައްކަތް ކުރަން އުޅެނިކޮށް ކަމަށެވެ. އަދި ފުރަތަމަ ރޯވީ ބައުޒަރުގައި ކަމަށް ބުނެފައި ވާއިރު މަންޒަރު ދުއް ބައެއް މީހުން ބުނެފައި ވަނީ އަލިފާން ރޯވީ، ލޯންޗަށް ތެޔޮއަޅާ ނިންމިތާ 30 ވަރަކަށް މިނެޓު ފަހުންނެވެ. އަދި އަލިފާން ރޯވާން ދިމާވީ، ދުންފަތުގެ އިސްތިއުމާލު ކުރުމަށް ސިނގިރޭޓް ރޯކޮށްގެން އުޅެނިކޮށް ކަމަށްވެސް މަންޒަރު ދުއް ބައެއް މީހުން ބުނެފައިވެއެވެ.
މިއަދު ހިނގި އަލިފާނުގެ ހާދިސާގައި 7 މީހަކު ފިހިގެން އައިޖީއެމް ހޮސްޕިޓަލަށް ގެންގޮސް ދަނީ ފަރުވާ ދެމުންނެވެ. އޭގެ ތެރެއިން އެކެއްގެ ހަށިގަނޑު 50 ޕަސެންޓް ފިހިފައި ވުމުން، ފަރުވާ ދެނީ އައިސީޔޫގައި ބާއްވައިގެންނެވެ. ބާކީ ތިބި މީހުންގެ ހަށިގަނޑުން ފިހިފައިވަނީ 20 ޕަސެންޓް ވަރު ކަމަށް އައިޖީއެމްއެޗުން ބުނެއެވެ. މީގެ އިތުރުން އެކަކު ހޭނެތިގެން ގެންގޮސް ފަރުވާ ދީފައި ވާއިރު އެކެއްގެ ބައެއް އިނގިލިތައް ބިންދައިގެން ދިއުމުގެ ސަބަބުން ގެންގޮސް ފަރުވާ ދީފައި ވާކަމަށް އައިޖީއެމް ހޮސްޕިޓަލުގެ މީޑިއާ ކޯޑިނޭޓަރު ބުނެފައި ވެއެވެ.
މިއަދު ހިނގި އަލިފާނުގެ ހާދިސާގައި ލިބުނު ގެއްލުން، ގެއްލުން ލިބުނު ފަރާތްތަކުން ދީފައިވާ މައުލޫމާތުގެ މައްޗަށް ބަލާނަމަ 10 މިލިއަން ރުފިޔާއާ ގާތް ކުރެއެވެ.
