ގަލޮޅުގައި ހުރި މޯބައިލް ފިހާރައެއް ފަޅާލައިގެން ވައްކަން ކޮށްގެން ފިލަން އުޅުނު މީހަކު ފުލުހުން ހައްޔަރު ކޮށްފިއެވެ.
ފުލުހުން ބުނީ މި މައްސަލަ ފުލުހުންނަށް ހުށަހަޅާފައިވަނީ ރޭ 4:40 ހާއިރު ކަމަށެވެ. އަދި ފުލުހުން އެ ސަރަހައްދަށް ދިޔައިރު އެ ފިހާރަ ތެރެއިން ދަބަހެއް ހިފައިގެން ނުކުތް މީހަކު ފުލުހުން ފެނުމާ އެކު ދަބަސް އެއްލައިލުމަށްފަހު ދުއްވައި ގެންފައިވާ ކަމަށެވެ.
ފުލުހުން ބުނީ، އެ މީހާގެ ފަހަތުން ގޮސް އޭނާ ފުލުހުންގެ ބެލުމުގެ ދަށަށް ގެނެސްފައިވާ ކަމަށާއި، އޭނާ އަކީ އުމުރުން 24 އަހަރުގެ ދިވެހި ފިރިހެނެއް ކަމަށެވެ. އެ މީހާ ފުލުހުންގެ ބެލުމުގެ ދަށަށް ގެނެސް ބަލައި ފާސް ކުރިއިރު އޭނާ އެއްލައިލި ދަބަސް ތެރެއިން ގިނަ އަދަދެއްގެ މޯބައިލް ފޯނާއި ޓެބްލެޓަކާއި މޯބައިލް ފޯނާ ގުޅުން ހުރި އެހެނިހެން ތަކެތި ފެނިފައިވާ ކަމަށް ފުލުހުން މައުލޫމާތުދެއެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
މިފަހަކަށް އައިސް ރާއްޖޭގައި ވައްކަމާއި ފޭރުން ދަނީ ދުވަހެއް ދުވަހަކަށް އިތުރު ވަމުންނެވެ. އެގޮތުން، މިދިޔަ އޮގަސްޓް މަހު 16 ވަނަ ދުވަހު ކަރަންކާ މަގުގައި ހުރި ފިހާރައެއްގެ ބިއްލޫރިގަނޑު ތަޅާލައިގެން އެ ފިހާރައިން ވައްކަން ކުރަން އުޅޭ ކަމަށް ފުލުހުންނަށް ރިޕޯޓް ކޮށްފައިވާ ކަމަށެވެ. އެކަން ފުލުހުންނަށް ރިޕޯޓްކުރުމާއި ގުޅިގެން، ފުލުހުން އެ ސަރަހައްދަށް ދިޔައިރު، 4 މީހަކު ދުވެފައި ދަނިކޮށް، ފެނިގެން އެމީހުން ފަހަތުން ގޮސް ހުއްޓުވާފައިވާ ކަމަށް ފުލުހުން ބުނެއެވެ.
އަދި އެމީހުން ފުލުހުންގެ ބެލުމުގެ ދަށަށް ގެނެސް ބަލައި ފާސްކުރި އިރު، އެކަކުގެ އަތުން އެފިހާރައިން ވަގަށް ނަގާފައިވާ 748.35 ދިވެހި ރުފިޔާއާއި، އިންޑިއަން 10 ރުޕީސްގެ އިތުރަށް، 5 ދިރްހަމް، ރާސްޓަސްކުރާ ނޯކިޔާ ބްރޭންޑްގެ ބައްތި ފޯނަކާއި، އަތުގަ އަޅާ ގަޑިއަކާއި ސިނގިރޭޓީ ފޮށި ފެނިފައިވާކަމަށް ފުލުހުން ބުނެއެވެ.
މި މައްސަލައާއި ގުޅިގެން ހައްޔަރުކޮށްފައިވަނީ އުމުރުން 23 އަހަރުގެ މީހަކާއި، 25 އަހަރުގެ މީހަކާއި، 26 އަހަރުގެ މީހަކާއި އަދި އުމުރުން 28 އަހަރުގެ ދިވެހި ފިރިހެނުންކަމަށް ފުލުހުން ބުނެއެވެ. މި މައްސަލަ ފުލުހުންދަނީ އިތުރަށް ތަހުގީގު ކުރަމުންނެވެ.
