ޓެރަރިޒަމްގެ ގާނޫނަށް އިސްލާހު ގެނައުމަށްޓަކައި، ދައުރުން ބޭރުގައި އިތުރު ޖަލްސާއެއް ބޭއްވުމަށް ރައްޔިތުންގެ މަޖިލީހުން ތާވަލުކޮށްފިއެވެ.
ރައްޔިތުންގެ މަޖިލީހުން ބުނީ ދައުރުން ބޭރުގައި ބާއްވާ ދެވަނަ ޖަލްސާ އޮންނާނީ އަންނަ އާދީއްތަ ދުވަހު ކަމަށެވެ. ދައުރުން ބޭރުގައި ޖަލްސާތަކެއް ބޭއްވުމަށް ނިންމާފައި ވަނީ، މަރު ކޮމިޝަނުން ތަހުގީގުކޮށް ނެރެފައިވާ ރިޕޯޓާއި ގުޅިގެން ޓެރަރިޒަމްގެ ގާނޫނަށް އިސްލާހުތަކެއް ގެނައުމަށެވެ.
އެގޮތުން ރައްޔިތުންގެ މަޖިލީހުގެ ފުރަތަމަ ދައުރު ނިމި، ޗުއްޓީ އަށް ގޮސްފައި ވަނިކޮށް ދައުރުން ބޭރުން ޖަލްސާއެއް ވަނީ މި މަހުގެ 12 ވަނަ ދުވަހު ބާއްވާފައެވެ. އެ ދުވަހު ވަނީ ސަރުކާރު ފަރާތުން ހުށަހެޅި ޓެރަރިޒަމްގެ ގާނޫނަށް އިސްލާހު ގެނައުމުގެ ބިލުގެ ފުރަތަމަ ބިލުގެ ފުރަތަަމަ ކިއުން އިއްވާފައެވެ.
12 ވަނަ ދުވަހު ބޭއްވި ޖަލްސާ ނިންމަވާލައްވަމުން މަޖިލީހުގެ ރައީސް، ރައީސް މުހައްމަދު ނަޝީދު ވަނީ ދައުރުން ބޭރުން އިތުރު ޖަލްސާއެއް ބާއްވާނަމަ ޕީޖީ ލީޑަރުންނާ މަޝްވަރާ ކުރައްވާނެ ކަމަށް ވިދާޅުވެފައެވެ. އެގޮތުން ދެ ވަނަ ޖަލްސާއެއް ބާއްވަން ތާވަލުކުރީ ޕީޖީ ލީޑަރުންނާ މަޝްވަރާ ކުރެއްވުމަށް ފަހު ކަމަށް މަޖިލީހުން ބުނެއެވެ. އަދި އެ ޖަލްސާއަށް ފަހު ދައުރުން ބޭރުން އިތުރު ޖަލްސާއެއް ބާއްވަން ޖެހޭނަމަ އެކަން ކުރައްވާނީ ވެސް ޕީޖީ ލީޑަރުންނާއި މަޝްވަރާ ކުރެއްވުމަށް ފަހު ކަމަށް މަޖިލީހުން ބުނެއެވެ.
މަޖިލިސް ގަވާއިދުގައި ވާގޮތުން ބިލެއްގެ ފުރަތަމަ ކިޔުން އިއްވުމަށްފަހު، އިބްތިދާއީ ބަހުސް ބޭއްވޭނީ، ހަތް ދުވަސް ފަހުންނެވެ. ނަމަވެސް ޕާލިމަންޓަރީ ގުރޫޕުގެ ލީޑަރުންނާ މަޝްވަރާ ކުރެއްވުމަށްފަހު، ލީޑަރުން އެއްބަސްވާނަމަ ތިން ދުވަސް ތެރޭ އިބްތިދާއީ ބަހުސް ބޭއްވިދާނެ ކަމަށް ގަވައިދުގައިވެއެވެ. ދެން އޮންނާނީ ޓެރަރިޒަމްގެ ގާނޫނަށް އިސްލާހު ގެނައުމުގެ ބިލުގެ އިބްތިދާއީ ބަހުސެވެ.
