ގިނަ ދުވަސްތަކެއް ވަންދެން ފުޓްބޯޅަ ޓީމާ އެކަހެރިކޮށްފައި ހުރުމަށްފަހު، ރާއްޖޭގެ ފުޓްބޯޅައިގެ ތަރި އަލީ އަޝްފާގު (ދަގަނޑޭ) ގައުމީ ޓީމަށް ނަގައިފިއެވެ.
ދޮޅު އަހަރެއްހާ ދުވަސް ވާންދެން ގައުމީ ޓީމަށް ދަގަނޑޭ ނުނަގާ ހުރުމަށްފަހު އަލުން ޓީމުގައި ހިމަނާފައިވަނީ ވޯލްޑް ކަޕް ކޮލިފައިންގައި އަންގާރަ ދުވަހު މާލޭގައި ޗައިނާއާ ދެކޮޅަށް ރާއްޖެ ކުޅޭ މެޗުގެ ސްކޮޑަށެވެ.
ދަގަނޑޭ ޓީމަށް ނެގުމާއެކު ޔޫތް މިނިސްޓަރު އަހުމަދު މަހުލޫފް ކުރެއްވި ޓްވީޓެއްގައި ވިދާޅުވީ ރައްޔިތުން އެދުނުގޮތަށް އަޝްފާގަށް ގައުމީ ޓީމުން އަލުން ފުރުސަތު ދިނީތީ ފުޓްބޯޅަ އެސޯސިއޭޝަން އޮފް މޯލްޑިވްސް އަށާއި، އެ އެސޯސިއޭޝަންގެ ރައީސް ބައްސާމް އަދީލް ޖަލީލަށް ޝުކުރު ދަންނަވާ ކަމަށެވެ. އަދި ވާހަކަ ދައްކައިގެން ކަންކަމަށް ހައްލު ހޯދޭނެކަމަށް ވެސް މަހުލޫފު ވިދާޅުވިއެވެ.
ދަނގަޑޭ ގައުމީ ޓީމުން ދުރުކުރީ، އޭޝިއަން ކޮލިފައިންގައި ބޫޓާނާ ދެކޮޅަށް ކުޅެން އޮތް މެޗުގެ ކުރިން ބޭއްވި ނޫސްވެރިންގެ ބައްދަލުވުމަކަށް ހާޒިރު ނުވުމުންނެވެ. ދަގަނޑޭ ޓީމުން ދުރުކުރިތާ މިހާރު މިވަނީ 15 ވަރަކަށް މަސްވެފައެވެ.
އަޝްފާގު އެންމެ ފަހުން ގައުމީ ޓީމާއެކު މެޗެއް ކުޅެފައި ވަނީ، އޭޝިއަން ކަޕް ކޮލިފިކޭޝަންގައި 2017 ވަނަ އަހަރު މާޗް މަހު ފަލަސްތީން އާ ދެކޮޅަށް ފަލަސްތީންގައި ކުޅުނު މެޗުގައެވެ.
