އިންޓަ ޕާލިމަންޓްރީ ޔޫނިއަން (އައިޕީޔޫ)ގެ ބައްދަލުވުމަށް ބައެއް ގައުމުތަކުގެ ގާނޫނު ހަދާ މަޖިލީހުގެ އިސްވެރިން ރާއްޖެ ވަޑައިގެންފި އެވެ.
މާދަމާ ފަށާ ބައްދަލުވުމަށް ސާކުގެ ހަ ގައުމެއްގެ މަޖިލީހުގެ ވެރިން ވަޑައިގެންފައި ވާއިރު ޕާކިސްތާނުން ވަޑައިގަތީ އެ ގައުމުގެ ގާނޫނު ހަދާ މަޖިލީހުގެ ނާއިބު ރައީސެވެ. ނަމަވެސް ދެން ހުރި ހުރިހާ ގައުމުތަކުން ވަޑައިގަތީ މަޖިލީހުގެ ރައީސުންނެވެ.
ދެ ދުވަހުގެ މުއްދަތަށް ބާއްވާ މި ބައްދަލުވުން އޮންނާނީ ރައްޔިތުން މަޖިލީހުގެ އިދާރާގައެވެ. މި ބައްދަލުވުމުގައި ބައިވެރި ނުވާ ގައުމުތަކަކީ ނޭޕާލާއި މިއަންމާއެވެ. މިއަންމާ އޮތީ މީގެކުރިން މި ބައްދަލުވުމުގައި ބައިވެރިވާ ގޮތަށެވެ. ނަމަވެސް ފަހުން އެ ގައުމުން ވަނީ ކެންސަލްކޮށްފައެވެ.
މިއީ ރާއްޖޭގައި މި ސަމިޓް ބާއްވާ ފުރަތަމަ ފަހަރެވެ. ރާއްޖޭގެ ފަރާތުން މި ސަމިޓުގައި ބައިވެރިވެވަޑައިގަންނަވާނީ ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދެވެ. މިފަހަރުގެ ބައްދަލުވުމުގައި މޫސުމަށް އަންނަ ބަދަލުތަކާ ގުޅޭގޮތުން މަޝްވަރާ ކުރުމަށް ވަނީ ހަމަޖެހިފައެވެ.
