ސުޕްރީމް ކޯޓުގެ ފަނޑިޔާރު އަބްދުﷲ ދީދީ މަގާމުން ވަކި ކޮށްދިނުމަށް ޖުޑީޝަލް ސާވިސް ކޮމިޝަން (ޖޭއެސްސީން) ރައްޔިތުންގެ މަޖިލީހަށް ހުށަހެޅި މައްސަލަ ޖުޑީޝަރީ ކޮމެޓީއަށް ފޮނުވައިފިއެވެ.
ޖޭއެސްސީން މަޖިލީހަށް ފޮނުވި މައްސަލަ އިއްވަމުން ރިޔާސަތުގައި އިންނެވި މަޖިލީހުގެ ނާއިބު ރައީސް އީވާ އަބްދުﷲ ވިދާޅުވީ އެ މައްސަލަ ވަގުތުން ޖުޑީޝަރީ ކޮމެޓީއަށް ފޮނުވާ ކަމަށެވެ.
ޖޭއެސްސީން މިއަދު ނެރުނު ބަޔާނުގައި ބުނީ، ފަނޑިޔާރު ދީދީ މަގާމުން ވަކި ކުރަން ނިންމާ، ރައްޔިތުންގެ މަޖިލީހަށް ހުށަހެޅުމަށް ނިންމީ، އޭނާއާ ބެހޭގޮތުން ޖޭއެސްސީން ތަހުގީގު ކުރަމުން ދިޔަ މައްސަލައިގެ ރިޕޯޓް އެ ކޮމިޝަނުން ބަލައިގަނެ، އެ ރިޕޯޓަށް ޖަވާބު ދިނުމަށް ފަނޑިޔާރު ދީދީއަށް 30 ދުވަހުގެ ފުރުސަތެއް ދިނުމަށް ފަހުއެވެ. އަދި އެ ފުރުސަތުގައި ފަނޑިޔާރު ދީދީ ޖޭއެސްސީއަށް ދީފައިވާ ޖަވާބުގައި ތަހުގީގު ރިޕޯޓުގެ ނިންމުމަށް ބަދަލެއް ގެންނާނެ ތަނެއް އޮތް ކަމަށް ކޮމިޝަނަށް ނުފެންނާތީ ކަމަށް އެ ކޮމިޝަނުން ބުނެއެވެ.
