އަނިޔާ ކުރުމަށްފަހު އައްޑޫ ސިޓީ މަރަދޫ ފުއްޓަރު ފަރާތަތަށް އެއްލާލައިފައި އޮތް މީހަކު ފެނިއްޖެ އެވެ.
ފުލުހުންގެ މީޑިއާ އޮފިޝަލް މައުލޫމާތު ދޭ ގޮތުގައި، އައްޑޫސިޓީ މަރަދޫ ފުއްޓަރު ފަރާތުގައި ޒަހަމްތަކާއެކު މީހަކުއޮތް މައުލޫމާތު ފުލުހުންނަށް ލިބިފައިވަނީ މިއަދު 15:30 ހާއިރުކަމަށެވެ. އަދި އަނިޔާވި މީހާއަށް ހިތަދޫ ރީޖަނަލް ހޮސްޕިޓަލުގައި މިހާރުދަނީ ފަރުވާ ދެމުން ކަމަށް ފުލުހުން ބުނެއެވެ.
ހިތަދޫ ރީޖަނަލް ހޮސްޕިޓަލުން މައުލޫމާތު ދޭ ގޮތުގައި އެމީހާއަށް މިހާރު ފަރުވާ ދެމުން ގެންދާ ކަމަށާއި، ޒަހަމްތަކެއް ލިބިފައިވީ ނަމަވެސް އޭނާގެ ހާލު ސްޓޭބަލް ކަމަށެވެ. ނަމަވެސް އެމީހާއަށް ލިބިފައި ހުރި ޒަހަމްތަކާ ބެހޭގޮތުން އިތުރު ތަފްސީލެއް ލިބިފައެއް ނުވެއެވެ.
މި މައްސަލައާއި ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާ ކަމަށް ފުލުހުން ބުނެއެވެ. މި މައްސަލަ ފުލުހުން ދަނީ އިތުރަށް ތަހުގީގު ކުރަމުން ނެވެ.
