ސުޕްރީމް ކޯޓުގެ ފަނޑިޔާރުންގެ ގޮތުގައި ޑރ. އަޒްމިރަލްދާ ޒާހިރާއި އަލްއުސްތާޒާ އައިޝާ ޝުޖޫނު އައްޔަން ކޮށްދިނުމަށް އެދި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރައްޔިތުންގެ މަޖިލީހަށް ފޮނުއްވި މައްސަލަ އިތުރަށް ދިރާސާ ކުރުމަށް މަޖިލީހުގެ ޖުޑިޝަރީ ކޮމިޓީއަށް ފޮނުވައިފި އެވެ.
މި ދެ ނަމުގެ އިތުރުން ޖުޑީޝަލް ސާވިސް ކޮމިޝަން (ޖޭއެސްސީން) ފޮނުވާފައިވާ 3 ބޭފުޅުންގެ ނަންވެސް ރައީސުލްޖުމްހޫރިއްޔާ މިއަދު ވަނީ މަޖިލީހަށް ފޮނުއްވައިފައެވެ. އެއީ ދަފްތަރު ނަންބަރު 6993 ޝުއައިބް ޙުސައިން ޒަކަރިއްޔާ، ހދ.ވައިކަރަދޫ ގްރީންވިލާ، މުޙައްމަދު ނިޔާޒުގެ އިތުރުން މއ.ވޭސައިޑް 610 ޢަލީ ސަމީރުގެ ނަމެވެ. މި ބޭފުޅުންގެ ނަންތައްވެސް ކޮމެޓީއަށް ވަނީ ފޮނުވާފައެވެ.
މިރޭގެ މަޖިލީހުގެ ޖަލްސާގައި ވާހަކަ ދައްކަވަމުން މަޖިލީހުގެ ރިޔާސަތުގައި އިންނެވި މަޖިލިސް ރައީސް، ރައީސް މުހައްމަދު ނަޝީދު ވިދާޅުވީ މި ނަންތައް ދިރާސާކޮށް ކޮމެޓީ ރިޕޯޓު އެކުލަވާލުމަށްފަހު މެންބަރުންނަށް ތިން ދުވަހުގެ މުހުލަތެއް ދޭންޖެހޭ ކަމަށެވެ. ނަޝީދު ވިދާޅުވީ ކޮމެޓީ ރިޕޯޓު ތަޅުމަށް ހުށަހެޅުމުން އެ ރިޕޯޓަށް ބަހުސް ކުރުމަށްފަހު ވޯޓަށް އައްސަވާނެ ކަމަށް ނަޝީދު ވިދާޅުވިއެވެ. ނަޝީދު ވިދާޅުވީ ފަނޑިޔާރުން އައްޔަން ކުރުމުގެ މައްސަލަ ބުރާސްފަތި ދުވަހާ ހަމައަށް ނިންމާ ނުލެއްވޭނެ ކަމަށެވެ.
ނަޝީދު ވިދާޅުވީ އަންނަ ބުރާސްފަތި ދުވަހަކީ މަޖިލީހުގެ މިދައުރުގެ ފަހު ދުވަސް ކަމަށެވެ. އެހެންކަމުން މަޖިލީހުގައި ކުރަން ހުރި މުހިއްމު މަސައްކަތްތައް ކުރުމަށްޓަކައި އިތުރު ތިން ހަތަރު ދުވަސް ބޭނުންވާ ކަމަށެވެ. އަދި ވިދާޅުވީ ސުޕްރީމް ކޯޓަށް ފަނޑިޔާރުން އައްޔަން ކުރަން އިތުރު ތިން ދުވަސް މަޖިލީހުގެ ދައުރަށް އިތުރުކުރަން ޖެހޭނެ އެވެ.
ސްޕްރީމް ކޯޓުގެ ފަނޑިޔާރުކަމުގެ މަގާމަށް އައްޔަން ކުރުމަށް ރައީސުލްޖުމްހޫރިއްޔާ ކަނޑައެޅުއްވި ދެ ބޭފުޅުންގެ ނަން ރައްޔިތުންގެ މަޖިލީހަށް ފޮނުއްވާފައިވަނީ އެބޭފުޅުން ސްޕްރީމް ކޯޓުގެ ފަނޑިޔާރުކަމުގެ މަގާމަށް އައްޔަން ކުރެއްވުމާ ގުޅޭގޮތުން ޖޭއެސްސީގެ މަޝްވަރާއާ އެކު ޤާނޫނުއަސާސީގެ 148 ވަނަ މާއްދާގެ (ހ) ގެ ދަށުންނެވެ.
ސްޕްރީމު ކޯޓުގެ ފަނޑިޔާރުންގެ ޢަދަދު 5 އިން 7 އަށް ބަދަލުކުރުމަށް ދިވެހިރާއްޖޭގެ ކޯޓުތަކުގެ ޤާނޫނަށް ރައްޔިތުންގެ މަޖިލީހުން ގެންނެވި އިސްލާހު ރައީސުލްޖުމްހޫރިއްޔާ ތަސްދީޤު ކުރައްވާފައި ވަނީ މިދިޔަ ޖުލައިމަހުގެ 23 ވަނަ ދުވަހުއެވެ.
