ދިވެހިރާއްޖޭގެ ސުޕްރީމް ކޯޓާ ގުޅޭ ގޮތުން ޖުޑީޝަލް ސާވިސް ކޮމިޝަން (ޖޭއެސްސީން) ތައްޔާރު ކޮށްފައިވާ ރިޕޯޓެއް ރައްޔިތުންގެ މަޖިލީހަށް އެ ކޮމިޝަނުން ފޮނުވައިފިއެވެ.
ޖޭއެސްސީން މިއަދު ނެރުނު ބަޔާނެއްގައި ބުނެފައިވަނީ ސުޕްރީމް ކޯޓުން ރައްޔިތުންގެ މަޖިލީހާއި އަދި ދައުލަތުގެ އެހެން މުއައްސަސާތަކުގެ އިހުތިސޯސުގެ ތެރެއަށް ވަދެފައި ވޭތޯ ބެލުމަށް އެ ކޮމިޝަނުން ނިންމުމާ ގުޅިގެން އެކަން ދިރާސާ ކުރަން ޖޭއެސްސީން އެކުލަވާލި ކޮމެޓީން ތައްޔާރު ކޮށްފައިވާ ރިޕޯޓުު މަޖިލީހާ ހިއްސާ ކޮށްފައި ވާ ކަމަށެވެ.
ނަމަވެސް ޖޭއެސްސީން ސުޕްރީމް ކޯޓާ ގުޅޭ ގޮތުން މަޖިލީހަށް ފޮނުވި ރިޕޯޓުގައި ފާހަގަ ކޮށްފައި ވަނީ ކޮން ކަންތައްތަކެއް ކަމެއް ނުބުނެއެވެ. މީގެކުރިން ޖޭއެސްސީން ވަނީ ކްރިމިނަލް ކޯޓާ ގުޅޭ ރިޕޯޓެއްވެސް މަޖިލީހަށް ފޮނުވާފައެވެ. އެ ރިޕޯޓުގައި އިސްލާހު ކުރަން ޖެހޭ ކަންކަން ޖޭއެސްސީން ވަނީ ފާހަގަ ކޮށްފައެވެ.
ސުޕްރީމް ކޯޓާ ގުޅޭ ރިޕޯޓެއް މަޖިލީހަށް ޖޭއެސްސީން ފޮނުވި އިރު އެ ކޯޓުގެ ތިން ފަނޑިޔާރުން ކަމަށްވާ އުއްތަމަ ފަނޑިޔާރު ޑރ. އަހްމަދު އަބްދުﷲ ދީދީ އާއި ފަނޑިޔާރު އާދަމް މުހައްމަދު އަބްދުﷲ އާއި ފަނޑިޔާރު އަބްދުﷲ އަރީފުގެ ސުލޫކީ މައްސަލައެއް ބެލުމަށް ފަހު، އެ ތިން ބޭފުޅުންނަށް ނަސޭހަތް ދިނުމަށް މީގެކުރިން އެ ކޮމިޝަނުން ނިންމާފައި ވެއެވެ.
