އަދީބު ދިރިއުޅުއްވާ އެޕާޓުމަންޓަށް ފުލުހުން ވަދެ ފާސްކޮށްފި އެވެ. ފުލުހުން މިކަމާ ގުޅޭ ގޮތުން އެއްވެސް އެއްޗެއް ބުނެފައި ނުވިމަނަމަވެސް ފުލުހުން ވަދެފައިވަނީ ގ. ހުމަށީގައި އަދީބު ދިރިއުޅުއްވާ 9 ވަނަ ފަންގެފިލާ ބަލާ ފާސް ކުރުމަށެވެ.
އެގޭގައި ހަރަކާތްތެރިވަނީ ފުލުހުންގެ ފޮރެންސިކު ޓީމެއް ކަމަށް މަންޒަރު ދުށް މީހަކު ވަނީ ބުނެފައެވެ.
އަދީބުގެ އެޕާޓުމަންޓަށް ފުލުހުން ވަދެފައި މިވާ ދަނޑިވަޅަކީ، ޓަގު ބޯޓެއްގައި ފިއްލަވައިގެން އަދީބު ރާއްޖެއިން ބޭރަށް ވަޑައިގަތުމުން ހައްޔަރުކޮށް އަނބުރާ ރާއްޖެ ގެންނަ ވަގުތެކެވެ.
މައުލޫމާތު ލިބިފައިވާ ގޮތުގައި މިރޭގެ ވަގުތެއްގައި އަދީބު ގޮވައިގެން ދަތުރު ކުރާ ކޯސްޓްގާޑަށް މާލެ އާދެވޭނެއެވެ. ނަމަވެސް އަދީބު ގެނެވޭނެ އިރެއް ނުވަތަ އެނޫންވެސް މައުލޫމާތެއް ކަމާ ގުޅުން ހުރި އިދާރާތަކުން ހާމަ ކުރުމަށް ދަނީ ފަސް ޖެހެމުންނެވެ.
