ގަވާއިދާ ހިލާފަށް އިންޑިއާއަށް އެތެރެވާން މަސައްކަތް ކުރެއްވި ކުރީގެ ނައިބު ރައީސް އަހުމަދު އަދީބު ގޮވައިގެން އިންޑިއާގެ ޓުޓިކޮރިންއަށް ދަތުރުކުރި "ވާގޯ-9" ޓަގު ބޯޓުގައި ތިބި އިންޑޮނޭޝިއާ ފަޅުވެރިން ދިވެހިރާއްޖޭގެ ސަލާމަތީ ބާރާ ހަވާލުކޮށްފައިވާކަމަށް އިންޑިއާގެ ޚަބަރުތައް ބުނެފިއެވެ.
ޓުޓިކޮރިން ބަނދަރުގެ މައުލޫމާތު އެނގިވަޑައިގަންނަވާ އޮފިޝަލަކާ ހަވާލާދީ ދަ ފެޑެރަލްގައި ބުނެފައި ވަނީ، އަދީބުގެ އިތުރުން ވާގޯ-9 ގައި ތިބި އިތުރު ފަޅުވެރިން ރޭ ދަންވަރުގެ ވަގުތެއްގައި ދިވެހިރާއްޖޭގެ ސަލާމަތީ ބާރުގެ ފުލުސް އޮފިސަރުންނާ "ހަވާލުކޮށްފައި" ވާކަމަށެވެ.
9 ފަޅުވެރިންނަކީ ވެސް އިންޑޮނޭޝިއާގެ ރައްޔިތުން ކަމަށާއި، ދަތުރުކުރުމަށް ބޭނުންވާ ސައްހަ ލިޔެކިއުންތައް އެމީހުންގެ އަތުގައި ހުރިކަމަށް ވެސް އިންޑިއާގެ ޚަބަރުތައް ބުނެއެވެ. ދިވެހިރާއްޖޭގެ ސަލާމަތީ ބާރުގެ ފުލުސް އޮފިސަރުންގެ ބެލުމުގެ ދަށަށް މި 9 ފަޅުވެރިން ގެންގޮސްފައި ވަނީ އަދީބު ފިލުވައިދިނުމަށް އެހީތެރިވުމުގެ އަޑީގައި ތިބި ފަރާތްތައް ދެނެގަތުމަށް ކަމަށްވެސް ދަ ފެޑެރަލްގައި ވަނީ ބަޔާންކޮށްފައެވެ.
މިކަމާ ބެހޭ ގޮތުން ދިވެހިރާއްޖޭގެ ކަމާބެހޭ އެއްވެސް އިދާރާއަކުން އަދި ރަސްމީކޮށް އެއްޗެއް ބުނެފައެއް ނުވެއެވެ.
