މިނިވަން ދުވަހުގެ މުނާއްސަބަތުގައި ރައީސް އިބްރާހިމް މުހައްމަދު ސޯލިހް އަދި އެމަނިކުފާނުގެ އަނބިކަނބަލުން ފަޒްނާ އަހުމަދު ބާއްވަވާ ރަސްމީ ބައްދަލުކުރެއްވުން ފަށައިފިއެވެ.
މި ރަސްމީ ބައްދަލުކުރެއްވުމަކީ ދިވެހި ރާއްޖެ މިނިވަންކަން މަތީ އޮންނަތާ 54 އަހަރު ފުރުމާ ގުޅިގެން، އެކަމުގެ މުނާއްސަބަތުގައި ދައުލަތުގެ އިސް މަގާމުތަކުގައި ތިއްބަވާ ބޭފުޅުންނާއި، ބޭރުގެ ސަފީރުންނާއި އަދި އެހެނިހެން ބައެއް ފަރާތްތަކާ ރައީސްގެ ދެކަނބަލުން ބައްދަލުކުރެއްވުމަށް ބާއްވަވާ ހާއްސަ މުނާސަބަތެކެވެ.
މި ރަސްމިއްޔާތު ފަށާފައި ވަނީ ގައުމީ ސަލާމުންނެވެ. އަދި އެއަށްފަހު ރަސްމިއްޔާތަށް ވަޑައިގެން ތިއްބެވި ފަރާތްތަކާ ރައީސްގެ ދެކަނބަލުން ބައްދަލުކުރައްވާ ދުވަހުގެ ތަހުނީއާ އާއި މުބާރިކުބާދީ ދަންނަވާނެއެވެ. އެއަށްފަހު މި ރަސްމިއްޔާތު ނިމޭނީ ހާއްސަ ބިލަތްމީރު ކޮށްލުމަކަށް ފަހުއެވެ. އެ ބިލެއް މީރުކޮށްލުމުގައި ރައީސްގެ ދެކަނބަލުން ބައިވެރިވެވަޑައިގަތުމަށް ވަނީ ހަމަޖެހިފައެވެ.
މި ބައްދަލު ކުރެއްވުމުގައި ރައްޔިތުންގެ މަޖިލީހުގެ ރައީސް ރައީސް މުހައްމަދު ނަޝީދު ހިމެނޭ ގޮތަށް ކުރީގެ ބައެއް ވެރިން ވަނީ ބައިވެރިވެ ވަޑައިގެންފައެވެ. އެހެން ނަމަވެސް ކުރީގެ ރައީސް އަބްދުﷲ ޔާމީން ރަސްމިއްޔާތުގައި ބައިވެރިވެވަޑައިގެންފައެއް ނުވެއެވެ.
މާދަމާއަކީ ރާއްޖެ މިނިވަންކަން މަތީ އޮންނަތާ 54 އަހަރު ފުރޭ މިނިވަން ދުވަހެވެ. މާދަމާ ގެ މުނާއްސަބަތުގައި ގިނަ ހަރަކާތްތަކެއް ކުރިއަށް ގެންދިއުމަށް ސަރުކާރުން ވަނީ ނިންމާފައެވެ. މިރޭގެ ރަސްމިއްޔާތަކީ 54 ވަނަ މިނިވަން ދުވަހުގެ ހަރާކާތްތަކުގެ ފެށުމެވެ.
