ފިލްމުގެ ނަމާ މެދު ހޫނު ބަހުސްތަކެއް ކުރަމުން ގޮސް އެންމެ ފަހު ވަގުތު ނަން ބަދަލުކޮށް، އެކްތާ ކަޕޫރުގެ "ޖަޖްމެންޓަލް ހޭ ކިޔާ" ގެ ފުރަތަމަ ޓްރޭލާ އާންމުކޮށް، ގިނަ ބައެއްގެ ސަމާލުކަން ހޯދައިފިއެވެ.
ކަންގަނާ ރެނޯޓްއާއި ރާޖްކުމާރު ރާއޯ ލީޑުން ފެނިގެންދާ މި ފިލްމު ބިނާވެފައި އޮންނަނީ ނަފްސާނީ ބަލީގެ ތަކުލީފުތަކެއް އުފުލަމުންދާ ބޮބީއާއި ކޭޝާވްއަށް ކުރިމަތިލާންޖެހޭ ކަންތައްތަކެއްގެ މައްޗަށެވެ. ފިލްމުގެ މުހިންމު ރޯލުން ފެނިގެންދާ އިތުރު ތަރިންގެ ތެރޭގައި އަމީރާ ދާސްތޫރު އަދި ރިޝީތާ ބަޓް ފާހަގަކޮށްލެވެއެވެ.
ފިލްމުގެ ފުރަތަމަ ޓްރޭލާ އާންމުކޮށްފައިވާ ބޮލީވުޑްގެ ގިނަ ތަރިންތަކެއް ވަނީ މި ފިލްމަށް ތާއީދުކުރާކަން ހާމަކޮށްފައެވެ. އެގޮތުން ވަރުން ދާވަންއާއި އަޝްވީނީ ތިވާރީ އަދި ރާމް ކަމާލް ފަދަ ތަރިން ވަނީ މިފިލްމުގެ މޮޅު ވާހަކަ ސޯޝަލް މީޑިއާގައި އާންމުކޮށްފައެވެ.
"ޖަޖްމެންޓަލް ހޭ ކިޔާ" ސިނަމާތަކުގައި އެޅުވުމަށް ހަމަޖެހިފައިވަނީ މިމަހުގެ 26 ވަނަ ދުވަހުއެވެ.
