ނޮވެމްބަރު 3، 1988 ގެ އުދުވާނީ ހަމަލާގައި ބައިވެރިވި ހ. ހާޖަރާގޭ އަބްދުﷲ ލުތުފީއަށް މައާފު ދޭން ޖެހޭ ކަމަށް މަރަދޫ ދާއިރާގެ މެންބަރު އިބްރާހިމް ޝަރީފް ވިދާޅުވެއްޖެއެވެ.
މިއަދު މަޖިލީހަށް ހުށަހެޅި ކުއްލި މައްސަލައަށް ބަހުސް ކުރައްވަމުން ޝަރީފް ވިދާޅުވީ، ލުތުފީއަކީ ބަލި ހާލު ދެރަ އުމުރުން ދުވަސްވީ މީހެއް ކަމަށާއި އޭނާއަށް މައާފު ދޭން ޖެހޭ ކަމަށެވެ. މިހާރު ފިލައިގެން އުޅުނު ކަމުގައިވީ ނަމަވެސް އޭނާއަކީ 70 އަހަރުވެފައިވާ މުސްކުޅިއެއް ކަމަށާއި އޭނާއަށް މައާފު ދޭން ޖެހޭ ކަމަށް ޝަރީފް ވިދާޅުވިއެވެ. ލުތުފީ ރާއްޖެ އަރާ ކުރި ކަންކަމަކީ ބޮޑު ކުށެއް ކަމަށް ގަބޫލު ކުރައްވާ ޝަރީފް ވިދާޅުވީ، އޭނާ އެކަމުގެ ހުކުމް ތަންފީޒު ކުރަމުންދާތާ އެތައް ދުވަހެއްވެފައިވާ ކަމަށެވެ.
ލުތުފީ އަވަހަށް ރާއްޖެ ގެނައުމަށް ރައްޔިތުންގެ މަޖިލީހަށް ކުއްލި ހުށަހެޅުމެއް ހުށަހަޅާފައި ވަނީ މަޑުއްވަރީ ދާއިރާގެ މެންބަރު އާދަމް ޝަރީފެވެ. މި މައްސަލައަށް ބަހުސް ކުރައްވަމުން އޭނާ ވިދާޅުވީ ލުތުފީ ރާއްޖެއިން ބޭރަށް ބޭސް ފަރުވާއަށް ފޮނުވުމުން ފިލައިގެން ގޮސް ލަންކާގައި ހުރުމަށްފަހު ލަންކާގައި ހުންނަ ރާއްޖޭގެ އެމްބަސީގައި އޭނާ ދިރިއުޅެމުންދާތީ އަދި އެމްބަސީތަކަކީ ސިފައިން އަދި ފުލުހުންނަށް ވެސް މީހުން ހައްޔަރުކޮށް ބޭތިއްބޭނެ ތަނަކަށް ނުވާތީ، އަދި މި މައްސަލަ ރާއްޖޭގެ އަދި އިންޓަނޭޝަނަލް ގާނޫނު ތަކުގެ އޮނިގަނޑަށް ނުފެތޭތީ، ވީ އެންމެ އަވަހަކަށް ލުތުފީ ރާއްޖެ ގެނައުމަކީ މުހިންމު ކަމެއް ކަމަށެވެ.
ލުތުފީ ބޭސްފަރުވާއަށް ދިޔައީ 2010 ވަނަ އަހަރުއެވެ. ކުރީގެ ރައީސް މުހައްމަދު ނަޝީދުގެ ސަރުކާރުން ޖެނުއަރީ 16، 2010 ގައި ލުުތުފީ ބޭސްފަރުވާއަށް ފޮނުވުމުން، އޭގެ ފަހުން އޭނާ އުޅެނީ ލަންކާގައި ފިލައިގެންނެވެ.
އެމްބަސީގައި ލުތުފީ ހުރިކަން އެނގުމާއެކު އޭނާ ގެންނަނީ ކަމަށް މިިދިޔަ އަންގާރު ފުލުހުން ބުނެފައިވެއެވެ. އަދި 48 ގަޑި އިރު ތެރޭގައި ގެންނާނެ ކަމަށް ބުނި ނަމަވެސް، އޭނާ އަދިވެސް ރާއްޖެ ގެނެވިފައި ނުވެއެވެ. އަދި ފުލުހުން ބުނެފައިވަނީ ސްރީލަންކާގެ ކަމާ ބެހޭ އިދާރާތަކުން ފުރިހަމަ ކުރަން ޖެހޭ ލިޔެކިޔުންތައް ފުރިހަމަ ކުރެވިފައި ނުވާތީ އޭނާ ގެނައުމުގައި ހުރަސްތަކެއް ހުރި ކަމަށެވެ.
ލަންކާގެ "ނިއުސް ފަސްޓް" ނޫހުގައި ރިޕޯޓްކޮށްފައި ވަނީ، ލުތުފީއާ ބެހޭ ގޮތުން ލަންކާގެ ފުލުހުންނާ ސުވާލު ކުރުމުން، ލުތުފީއާ ގުޅޭ މައުލޫމާތު ލިބިފައި އެގަމުގެ ފުލުހުންނަށް ލިބިފައި ނެތް ކަމަށެވެ. އަދި ލަންކާގައި ހުންނަ ރާއްޖޭގެ އެމްބަސީ އަށް ލިބިފައިވާ ޑިޕްލޮމެޓިކް އިމިއުނިޓީ ބޭނުން ކޮށްގެން ޓެރަރިސްޓަކަށް ހިމާޔަތް ދިން މައްސަލައިގައި ލަންކާގެ ފޮރިން މިނިސްޓްރީގެ ބަހެއް ހޯދަން އުޅެ ނުލިބުނު ކަމަށް ވެސް އެ ނޫހުގައި ވަނީ ބުނެފައެވެ.
މީގެ އިތުރުން ލުތުފީ އެމްބަސީގައި ބަހައްޓާފައި ހުރީ ލަންކާ ސަރުކާރުގެ ކަމާބެހޭ އިދާރާތަކާ ގުޅިގެން ކަމަށް ދިވެހި ސަރުކާރުން ބުނި ނަމަވެސް، އެކަން ލަންކާގެ ފުލުހުން ވަނީ ދޮގުކޮށްފައެވެ. އަދި ލުތުފީ އެމްބަސީގައި ހުރިކަމުގެ އެއްވެސް މައުލޫމާތެއް ލިބިފައި ނުވާ ކަމަށް ލަންކާ ފުލުހުންނާ ހަވާލާދީ ނޫހުގައި ބުނެފައިވެއެވެ.
ލަންކާ އެމްބަސީއަށް ލުތުފީ ވަން ދުވަހާ މެދު ސުވާލު އުފެދިފައި ވާއިރު ސަރުކާރުން ހާމަ ކުރި ތާރީހުން ގުނަންޏާ ލުތުފީ ހުންނަތާ 7 ހަފްތާ ފަހުން އޭނާ އެތަނުގައި ހުރިކަން ދިވެހި ސަރުކާރުން ހާމަކޮށްފައި ވަނީ މިދިޔަ ހޯމަ ދުވަހުއެވެ. އަދި މީގެ ކުރިން ލުތުފީއާ ބެހޭ އެއްވެސް މައުލޫމާތެއް ސަރުކާރުން ހާމަކޮށްފައެއް ނުވެއެވެ.
ލުތުފީ ލަންކާގެ އެމްބަސީގައި ހުރިކަން ހާމަ ކުރެއްވީ ކުރީގެ ހޯމް މިނިސްޓަރު އުމަރު ނަސީރެވެ. އުމަރު ނަސީރު ވިދާޅުވީ ލުތުފީ ހުންނަނީ އެމްބަސީގައި ވީއައިޕީ ފެންވަރުގައި ކަމަށާއި، ނިދަނީ އެމްބެސަޑަރު ކޮޓަރިއާއި ޖެހިގެން ހުންނަ ކޮޓަރީގައި ކަމަށެވެ. އަދި ދުއްވަން ބޭނުން ކުރަނީ ޑިޕްލޮމެޓިކް ކާރުކަމަށް އުމަރު ވިދާޅުވިއެވެ.
އިދިކޮޅު ކޯލިޝަން ޕާޓީތަކުން ބުނެފައިވަނީ ލުތުފީ މައްސަލައިގައި ސަރުކާރުން ހަދަނީ ދޮގު ކަމަށާ، ލުތުފީ އެމްބަސީއަށް ވަދެފައިވަނީ އެޕްރީލް މަހުގެ ތެރޭގައި ކަމަށެވެ.
ލުތުފީގެ ނަމުގައި މިހާރު ޓްވިޓާ އެކައުންޓެއްވެސް ހިންގަމުން އެބަދެއެވެ. އިއްޔެގެ ވަގުތެއްގައި ހުޅުވި މި އެކައުންޓުން، ލުތުފީގެ ކުށެއް ނެތްކަން ސާބިތުކޮށްދިނުމުގެ މަގުސަދުގައި ޓްވީޓްތައް ދަނީ ކުރަމުންނެވެ.
