ދުބާއީއާއި ބެއިރޫތުގައި ހިންގާ "ވައިޓް" ބްރޭންޑްގެ "ހަލާލު" ނައިޓްކުލަބެއް ސައުދީ އަރަބިއްޔާގެ ޖިއްދާގައި ހުޅުވުމަށް ހަމަޖެހިފައި ވާކަމަށް އެޑްމައިންޑް ހޮސްޕިޓާލިޓީ ގުރޫޕުން ބުނެފިއެވެ.

ކެފޭއަކާ ލައުންޖެއް ހިމެނޭ ގޮތަށް މި ނައިޓްކުލަބު ހުޅުވަނީ ޖިއްދާ ވޯޓާ ފްރަންޓާ ވެސް އެކުގައި ކަމަށާ، މިތަނަކީ ހުރިހާ ރަހައެއްގެ މިއުޒިކު އިވިގެންދާނެ ތަނެއް ކަމަށް މައުލޫމާތު ލިބެއެވެ. މީގެ އިތުރުން އަންހެނުންނާ ފިރިހެނުންނަށްވެސް ބޭނުން ކުރެވޭނެ ޑާންސް ފްލޯއެއް މި ނައިޓްކުލަބުގައި އޮންނާނެ ކަމަށާ، ދެޖިންސު މަސްހުނިވާ ގޮތަށް ބާއްވާ އިވެންޓުތަކަށް ސައުދީ ސަރުކާރުގެ ހުއްދަވެސް ނަގަން ނުޖެހޭނެ ކަމަށް މައުލޫމާތު ލިބެއެވެ.

ނަމަވެސް މި ކެފޭއާއި ލައުންޖުން ރަލުގެ އެއްވެސް ބާވަތެއްގެ ވިޔަފާރި ނުކުރާނެ ކަމަށްވެސް ޚަބަރު ލިބެއެވެ.

ގާތްގަނޑަކަށް 2000އެއްހާ މީހުންނަށް އެއްފަހަރާ ހިދުމަތްދެވޭ މި ނައިޓްކުލަބުގެ ފުރަތަމަ ރޭ، މަޝްހޫރު އާރް އެން ބީ ލަވަކިއުންތެރިޔާ ނެޔޯގެ ހާއްސަ ޝޯއެއް ދޭ ގޮތަށްވެސް ވަނީ ހަމަޖެހިފައެވެ. ފާއިތުވީ އަހަރެއްހާ ދުވަހަށް ބަލާއިރު ބައިނަލްއަގުވާމީ ފެންވަރުގެ ގިނަ ތަރިންތަކެއް ވަނީ ސައުދީގައި ޝޯ ދީފައެވެ. އެގޮތުން އެންރިކޭ އިގްލޭސިއަސް، ޑޭވިޑް ގެޓާ، މަރާޔާ ކެރީ، އަދި އޭކޯން ފާހަގަކޮށްލެވެއެވެ.

މުނިފޫހިފިލުވުން