އަލްޓިމޭޓް ފައިޓިންގް ޗެމްޕިއަންޝިޕް (ޔޫއެފްސީ) ރިންގުގައި، ހޮލީވުޑްގެ ތަޖުރިބާކާރު ބަތޮލް، ޓޮމް ކުރޫޒްއާއި ތަޅަން ބޭނުންކަމަށް، އުމުރުން އެންމެ 25 އަހަރުގެ ޒުވާން ލަވަކިއުންތެރިޔާ ޖަސްޓިން ބީބާ ބުނެ، ގޮންޖަހައިފިއެވެ.
106 މިލިއަނެއްހާ "ފޭނުން" އޭނާ ފޮލޯކުރަމުންދާ ޓުވިޓާ މެދުވެރިކޮށް ޖަސްޓިން ބީބާ ބުނީ ޔޫފްސީ ރިންގަށް އަރާ، އޭނާއާއި ތަޅަން ފަސްޖެހިއްޖެނަމަ ޓޮމް ކުރޫޒްއަކީ "ފިނޑި"، އަދި ކަންކަމާ ބިރު ގަންނަ މީހެއް ކަމަށެވެ.
ޖަސްޓިން ބީބާގެ މި ޓުވީޓާއެކު މުޅި ސޯޝަލް މީޑިއާ ވަނީ ގުގުމާލާފައެވެ. ގިނަ ބަޔަކަށް މިކަން ވީ ޖޯކަކަށެވެ.
ޓޮމް ކުރޫޒްއާއި ޖަސްޓިން ބީބާގެ ފޭނުން މިކަމާ ހޫނު ބަހުސްތައް ކުރަމުންދާއިރު، ކުރީގެ ޔޫއެފްސީ ޗެމްޕިއަން ކޮނޯ މެކްގްރެގާވެސް ވަނީ އޭނާގެ ހިޔާލުފާޅުކޮށްފައެވެ. އަދި އޭނާގެ އަމިއްލަ ކުންފުނިން މި ތެޅުންގަނޑު ހޮސްޓުކޮށްދިނުމަށް ތައްޔާރުކަން ކޮނާ މެކްގްރެގާ ވަނީ ބުނެފައެވެ.
ޔޫއެފްސީ ރިންގުގައި ޓޮމް ކުރޫޒްއާއި ކުރިމަތިލާން ގޮންޖަހަންޖެހުނު ސަބަބެއް ޖަސްޓިން ބީބާ ހާމަކޮށްފައި ނުވާއިރު، މިކަމާ ބެހޭ ގޮތުން ޓޮމް ކުރޫޒްވެސް އަދި އޭނާގެ ޓީމުންވެސް އެއްޗެއް ބުނެފައެއް ނުވެއެވެ.
