ކަސޯޓީ ޒިންދަގީ ކޭ 2ގައި މިސްޓާ ބަޖާޖުގެ ރޯލުން ފެނިގެންދާ ކަރަން ސިންހް ގްރޫވަރު، އޭނާގެ "މިސްޓާ ބަޖާޖު ލުކް" ދައްކާލައިފިއެވެ.
އަނޫރާގްއާއި ޕްރޭނާގެ ދިރިއުޅުން ވިއްސިވިހާލިކޮށްލާ މިސްޓާ ބަޖާޖުގެ ގޮތުގައި ކަސޯޓީ ޒިންދަގީ ކޭގެ އޮރިޖިނަލް ސީރީޒްއިން ފެނުނު ރޯނިތު ރޯއީއާއި ކަރަން ގްރޫވަރުގެ ފެނިލުމާ މާބޮޑު ތަފާތެއް ނެތްކަމަށް އިންޑިއާގެ މުނިފޫހިފިލުވުމުގެ ދާއިރާގެ ޚަބަރުތައް ބުނެއެވެ.
މިސްޓާ ބަޖާޖުގެ ރޯލުން ފެނިގެންދާނެ ޒުވާން ބަތޮލަކާ މެދު ކުރެވެމުންދިޔަ ހޫނު ބަހުސްތައް ނިމުމަކަށް ގެނެސް، މިސްޓާ ބަޖާޖުގެ ގޮތުގައި ހަމަޖެއްސި ކަރަން ސިންހް ގުރޫވަރުގެ މަންޒަރުތައް، ކުރިއަށް ހަފުތާ ތެރޭގައި ދައްކަން ފަށާނެ ކަމަށް މައުލޫމާތު ލިބެއެވެ.
ވާހަކަ މިހާތަނަށް ގޮސްފައިވާ ގޮތަށް ބަލާއިރު ވިޔަފާރިވެރިޔާ މިސްޓާ ބަޖާޖުގެ ހިލަމެއް، އަނޫރާގްއާއި ޕްރޭނާއަށް ވަނީ ވެފައެވެ. އަނޫރާގުގެ ވިޔަފާރި އަތުލާ، އޭނާގެ ދިރިއުޅުން ވިއްސިވިހާލިކޮށްލުމަށް މިސްޓާ ބަޖާޖު އަންނަކަން އަނޫރާގްއާއި ޕްރޭނާއަށްވެސް އެނގެއެވެ.
ކުރިއަށް އޮތް އެޕިސޯޑްތަކުގައި ފެނިގެންދާނީ ޕްރޭނާއާއި އަނޫރާގުގެ ކައިވެންޏާ ގުޅުންހުރި ކަންތައްތަކެއް ކަމަށް ވާއިރު، މިސްޓާ ބަޖާޖުގެ ގޮތުގައި ކަރަން ފެނިގެންދާނީ މިހާ ހިސާބުންނެވެ. އަދި އެއާއެކު އަނޫރާގްއާއި ޕްރޭނާގެ ލޯބީގެ ވާހަކަ މުޅިން އެހެން މިސްރާބަކަށް ބަދަލުކޮށްލާނެއެވެ.
