3 މަސްދުވަހުގެ މެދުކެނޑުމަކަށްފަހު ފުރަތަމަ ފަހަރަށް ޕާކިސްތާނު ހުރަސްކޮށް އިންޑިއާގައި ފްލައިޓެއް ޖައްސައިފިއެވެ.
އެއްގައުމު އަނެއް ގައުމުގެ ވައިގެ ސަރަހައްދު ބޭނުންކުރުން މަނާކޮށް ވައިގެ ސަރަހައްދު ބަންދުކުރުމުގެ އަމަލުތަކެއް ހިންގި ފަހުން ފުރަތަމަ ފަހަރަށް މި ރޫޓޫން ދަތުރުކޮށް އިންޑިއާގެ ވެރިރަށް ނިއުދިއްލީގައި ޖައްސާފައިވަނީ އިއްތިހާދު އެއާލައިންސްގެ މަތިންދާ ބޯޓެކެވެ. މި މަތިންދާބޯޓަކީ އަބޫދާބީއިން ފުރައިގެން ދިއްލީއަށް ދަތުރުކުރި ބޯޓެކެވެ.
އިއްތިހާދު އެއާވޭޒް ފްލައިޓް އީވައި225 ޕާކިސްތާނުގެ ވައިގެ ސަރަހައްދަށް ވަނީ އާދީއްތަ ދުވަހުގެ ހަވީރު 05:34 ގައެވެ. އެއީ އިންޑިއާއާއި ޕާކިސްތާނާ ދެމެދު ވައިގެ އުދުހުމަށް ހާއްސަ ކުރެވިފައިވާ އެއް ރޫޓު ހުޅުވާލިތާ އެންމެ 4 މިނެޓް ފަހެވެ. އެއާބަސް އޭ321 މަރުކާގެ މި ބޯޓު ދިއްލީގައި ޖެއްސީ، އިންޑިއާ ގަޑިން އިރުއޮއްސި 7 ޖެހިއިރުއެވެ. މި ރޫޓުން ދަތުރުކުރުމުން 40 މިނެޓުގެ ވަގުތު ދަތުރަށް ސަލާމަތްކުރެވިފައިވާކަމަށް މައުލޫމާތު ލިބެއެވެ.
އިންޑިއާއާއި ޕާކިސްތާނާ ދެމެދު ވައިގެ އުދުހުންތަކަށް އެންމެ ފަހުން ބުރޫ އަރާފައިވަނީ މިއަހަރުގެ ކުރީކޮޅު ޕުލްވާމާއަށް ދިން ހަމަލާތަކާ ގުޅިގެން މި ދެގައުމުގެ މެދުގައި އޮތް ޒަމާންވީ ހަތުރުވެރިކަން އިންތިހާއަށް ނުތަނަވަސްވެ، އިންޑިއާގެ އަސްކަރީ މަތިންދާބޯޓުތަކެއް ޕާކިސްތާނުގެ ވައިގެ ސަރަހައްދަށް ވަދެގެން އުޅުނު މައްސަލާގައި ފެބުރުވަރީ މަހުގެ 27 ވަނަ ދުވަހުއެވެ.
