ބޮލީވުޑްގެ ކުޅަދާނަ ބަތޮލާ އައިޝްވާރިޔާ ރާއީގެ ކިބައިން މައާފަށް އެދެންވެސް ތައްޔާރަށް ހުރި ކަމަށާ، ނަމަވެސް އޭގެ ކުރިން، އޭނާއަށް ގޯސްކޮށް ކުރެވުނީ ކޮން ކަމެއްކަން ބަޔާންކޮށްދިނުމަށް ބޮލީވުޑްގެ އެކްޓަރު ވިވޭކް އޮބަރޯއީ ގޮވާލައިފިއެވެ.
ދާދިފަހުން އިންޑިއާގައި ނިންމާލި އާންމު އިންތިހާބުގެ އެގްޒިޓް ޕޯލްސްއާއި ގުޅިގެން އައިޝްވާރިޔާއަށް ހަޖޫޖަހާ ފަދަ މޭރުމަކުން ސޯޝަލް މީޑިއާގައި އާންމުވި މީމްއެއްގެ މައްސަލާގައި އޮބެރޯއީ މިހާރު އޮތީ ހޫނުފެނުގައެވެ. ނަމަވެސް އޮބެރޯއީ ބުނަމުންދަނީ، އެހެން މީހަކު ކުރި މީމްއަކަށް ރިއެކްޓް ކުރުމަކީ އެކަމުގައި މައްސަލައެއް އޮތް ކަމެއްގެ ގޮތުގައި އޭނާއަށް ނުދެކެވޭ ކަމަށެވެ.
އޭނާއަކީ އެއްވެސް ހާލެއްގައި ސޯޝަލް މީޑިއާގައި ދައުރުވާ މީމްތައް ސީރިއަސްކޮށް ނަގާ މީހެއް ނޫންކަމަށާ، ނަމަވެސް އެ މީމްތައް އުފައްދާ ފަރާތްތަކުގެ ފަންނުވެރިކަމާ ފާޑުވެރިކަމަށް އޭނާއަށް ތައުރީފުކުރެވޭ ކަމަށްވެސް އޮބެރޯއީ ވަނީ ފާހަގަކޮށްފައެވެ.
އިންޑިއާގެ ނޭޝަނަލް ކޮމިޝަން ފޯ ވިމެންއިންވެސް ވަނީ އޮބެރޯއީ މައާފަށް އެދުމަށް ގޮވާލާފައެވެ. ނޫންނަމަ ގާނޫނީ ފިޔަވަޅު އަޅާނެ ކަމުގެ އިންޒާރުވެސް އެ ފަރާތުން ވަނީ ދީފައެވެ.
މިމީމްއަކީ އިންޑިއާގެ އާންމު އިންތިހާބުގެ އެކި މަރުހަލާތައް، ރީތީގެ ރާނީ އައިޝްވާރިޔާ ރާއީ ބައްޗަންގެ ލޯބީގެ މާޒީއާއި އަޅުވާ ކިއާ ގޮތަށް ތައްޔާރުކޮށްފައިވާ މީމްއެކެވެ. މިމީމްއިން ފެންނަ އިތުރު ފަރާތްތަކުގެ ތެރޭގައި އައިޝްވަރިޔާއާއި ލޯބީގެ ގުޅުންތަކެއް ހިންގި ސަލްމާން ހާންއާއި މިހާރުގެ ފިރިމީހާ އަބީޝޭކް ބައްޗަންގެ އިތުރުން ޚުދު ވިވޭކް އޮބެރޯއީވެސް ހިމެނެއެވެ.
