ކެލިފޯނިއާގެ ގަވަރުނަރުކަންވެސް ކޮށްފައިވާ އެމެރިކާގެ މަޝްހޫރު އެކްޓަރު އާނޯލްޑް ޝުވެޒެނެގާއަށް އާންމު ތަނެއްގައި ހަމަލާދީފިއެވެ.
ކުޅިވަރު މައިދާނުގައި ހަރަކާތްތެރިވާ ގިނަ ބަޔަކު ޝާމިލުކޮށްގެން ކޮންމެ އަހަރެއްގެވެސް މޭ މަހު އޭނާ ކުރިއަށް ގެންދާ "ދަ އާނޯލްޑް ކްލެސިކް އެފްރިކާ" އިވެންޓުގައި އާނޯލްޑް ޝުވެޒެނެގާއަށް ހަމަލާދީފައިވަނީ އޭނާގެ ފަހަތުން އައި މީހެކެވެ.
އާނޯލްޑްގެ ގައިގައި އެމީހަކު ފްލައިންގްކިކެއް ޖެހުމާއެކު ހިސާބަކަށް އާނޯލްޑް ކުރިއަށް ވެއްޓޭ ގޮތްވެއެވެ. ސޯޝަލް މީޑިއާގައި މި ވީޑިއޯ ވައިރަލް ވަމުން ދާއިރު އާނޯލްޑްވަނީ ހަމަލާދިން މީހާއަށް ސަމާލުކަން ދިނުމުގެ ބަދަލުގައި އެތަނުގައި ތިބި އެތްލީޓުންނަށް ސަމާލުކަން ދިނުމަށް އޭނާގެ ފޭނުންނަށް ގޮވާލައިފައެވެ. އެކަމެއް ހިނގިކަންވެސް އަސްލު ނޭނގޭ ކަމަށާ، އޭނާގެ ގައިގައި މީހަކު ޖެހީކަން އެނގުނީ ސޯޝަލް މީޑިއާގައި ދައުރުވި ވީޑީއޯއިން ކަމަށާ، އޭގެ ކުރިން އޭނާ ހީކުރީ އާންމުކޮށް މީހުންވެސް އެއްވެ އުޅޭ ތަންތަނުގައި ކޮއްޕާ ހަދާ އުސޫލުން ކަމެއް ހިނގީ ކަމަށްވެސް އާނޯލްޑް ވަނީ ކިއާދީފައެވެ. އަދި މާ ބޮޑު އަނިޔާއެއް ނުވާކަމަށާ، އެކަމާ މާ ބޮޑަށް ހާސް ނުވުމަށްވެސް އާނޯލްޑް ވަނީ އޭނާގެ ފޭނުންނަށް ގޮވާލާފައެވެ.
އާނޯލްޑަށް ހަމަލާދިން މިހާ މިހާރުވަނީ ފުލުހުންގެ ބެލުމުގެ ދަށުގައެވެ.
