ގިނަ ބައެއްގެ ސަމާލުކަން ހޯދާފައިވާ ޓީވީ ސީރީޒް "ގޭމް އޮފް ތްރޯންސް"އަށް ހަމަ ހަގީގަތުގައިވެސް ފިނި މޫސުން އަތުވެއްޖެއެވެ.
"ގޭމް އޮފް ތްރޯންސް"ގެ އެންމެ ސީޒަން މިހާރު އާންމުކޮށް ދައްކަމުންދާއިރު، ފޭނުން ދެމުންދަނީ ފިނި ތަރުހީބެކެވެ. މިހާރު ދައްކާ 8 ވަނަ ސީޒަން އަލުން ކުޅުމަށް ގޮވާލާ، "ގޭމް އޮފް ތްރޯންސް"ގެ އެތައް ހާސް ފޭނުނެއް ވަނީ ޕެޓިޝަނެއްވެސް ތައްޔާރުކޮށްފައެވެ.
8 ވަނަ ސީޒަން އަލުން ކުޅުމަށް އެޗް.ބީ.އޯއަށް ގޮވާލާ ޕެޓިޝަންގައި މިހާތަނަށް 500000އަށްވުރެ ގިނަ ފޭނުންވަނީ ސޮއިކޮށްފައެވެ.
ޖޯޖް އާރް އާރް މާޓިންގެ ވާހަކަތަކެއްގެ މައްޗަށް ބިނާކޮށް އުފައްދަމުންދާ ޓީވީ ސީރީޒް "ގޭމް އޮފް ތްރޯންސް"އަށް ގިނަ ބަޔަކު ދަނީ ފާޅުގައި ފާޑުކިއަމުންނެވެ. ގިނަ ބަޔަކު ހިތްހަމަނުޖެހިގެން އުޅެނީ އެމީހުން އެންމެ ގަޔާވެ، އަދި ޝައުގުވެރިކަމާއެކު ބަލަމުންދިޔަ "ކެރެކްޓަރު"ތަކަކަށް އިހާނެތިކޮށް ހިތުމުން ކަމަށް ބުނެވެއެވެ.
އޮންލައިންކޮށް ދައުރުކުރަމުންދާ ޕެޓިޝަންގައި ބުނެފައިވަނީ، ކަމަށް ގާބިލު ލިޔުންތެރިން ލައްވާ ސީރީޒްގެ ސްކްރިޕްޓް އަލުން ލިޔުއްވައިގެން މަންޒަރުތައް އަލުން ކުޅެންޖެހޭ ކަމަށެވެ. މިހާރުގެ ލިޔުންތެރިންގެ ގޮތުގައި މަސައްކަތްކުރަމުން އަންނަ ޑޭވިޑް ބިނޯފްއާއި ޑީބީ ވީޒްއަކީ ކަމަށް ގާބިލު ލިޔުންތެރިން ނޫންކަމަށްވެސް "ގޭމް އޮފް ތްރޯންސް"ގެ ފޭނުން ދަނީ ބުނަމުންނެވެ.
"ގޭމް އޮފް ތްރޯންސް"ގެ ވާހަކަ ބިނާ ކުރަމުންދާ މާޓިންގެ އެންމެ ފަހު ފޮތް އަދި އާންމެއް ނުކުރެއެވެ. "ދަ ވިންޑްސް އޮފް ވިންޓާ"ގެ މަސައްކަތް އަދިވެސް ކުރިއަށްދާއިރު، "ގޭމް އޮފް ތްރޯންސް"ގެ ޓީވީ ސީރީޒްގެ ނިމުން ގެނެސްފައިވަނީ ވާހަކަ ފޮތާ މުޅިން ތަފާތު ގޮތަކަށް ކަމަށް ވެއެވެ.
"ގޭމް އޮފް ތްރޯންސް"ގެ 8 ވަނަ ސީޒަނަށް ފާޑުކިއަމުންދާ ފަރާތްތަކުން ބުނާ ގޮތުގައި 8 ވަނަ ސީޒަންއަކީ ހަގީގީ ލިޔުންތެރިޔާއަށް ކުރި ބޭއިހުތިރާމެއް ކަމަށާ، 8 އަހަރު ދުވަސްވަންދެން މުއްސަނދި ކުރަމުން އައި ކެރެކްޓަރުތަކުގެ މަސައްކަތްވެސް ފެނަށް ދުއްވާލި ސީޒަނެއް ކަމަށެވެ.
"ގޭމް އޮފް ތްރޯންސް"ގެ 8 ވަނަ ސީޒަންއަކީ އަވަސްއަރުވާލައިގެން ހަދާފައިވާ ސީޒަނެއް ކަމަށާ، ނަތީޖާއަކީ ފަރުވާކުޑަ މަންޒަރުތަކަކާ ވާހަކަތަކެއް ފެނިގެންދިއުން ކަމަށްވެސް "ގޭމް އޮފް ތްރޯންސް"ގެ ފޭނުން ދަނީ ބުނަމުންނެވެ.
"ގޭމް އޮފް ތްރޯންސް"ގެ 8 ވަނަ ސީޒަންގެ ކޮންމެ އެޕިސޯޑެއްވެސް އުފައްދާފައިވަނީ ގާތްގަނޑަކަށް 15 މިލިއަން ޑޮލަރު ޚަރަދުކޮށްގެން ކަމަށްވާއިރު، ސީޒަން 8 އަލުން ލިޔެގެން ކުޅުމަށް ފޭނުން ކުރަމުންދާ ޑިމާންޑަށް އެޗް.ބީ.އޯއިން ބޯލަނބާނެކަމަކަށް ނުބެލެވެއެވެ.
