ޒުވާން ލަވަކިއުންތެރިޔާ ޖަސްޓިބް ބީބާ (ޖޭބީ) އާއި އެޑް ޝީރަންގެ އެންމެ ފަހުގެ ލަވަ "އައި ޑޯންޓް ކެއާ"ގެ މިއުޒިކް ވީޑިއޯގެ މަލަމަތި ފޭނުންނަށް ދައްކާލައިފިއެވެ.
އިންސްޓަގްރާމްގައި ހިއްސާކުރި ޕޯސްޓެއްގައި އެޑް ޝީރަން ބުނީ ވަރަށް އަވަހަށް މުޅި ވީޑިއޯ ފެނިގެންދާނެ ކަމަށެވެ. މި ޕޯސްޓާއެކު އެޑް ޝީރަންވަނީ ވީޑިއޯ ލަވައިގެ ކުޑަތަންކޮޅެއް އޭނާގެ ފޭނުންނާ ހިއްސާކޮށްފައެވެ.
ޖޭބީވެސް ވަނީ ދެތަރިން އެކުގައި ވީޑީއޯއިން ފެނިގެންދާނެކަން ހާމަކޮށްފައެވެ.
ޖަސްޓިން ބީބާއާއި އެޑް ޝީރަން އެންމެ ފަހުން އެކުގައި މަސައްކަތްކޮށްފައިވަނީ މީގެ 4 ވަރަކަށް އަހަރު ކުރިންނެވެ. އެއީ ޖޭބީ ހުށަހަޅާދިން މަޝްހޫރު ލަވަ "ލަވް ޔޯ ސެލްފް"އެވެ. ޖޭބީއަށް އެ ލަވަ ލިޔެދީފައިވަނީ ޒުވާނުން ގަޔާވާ ގިނަ ލަވަތަކެއް ލިޔެދީފައިވާ މިއުޒީޝަން އެޑް ޝީރަންއެވެ.
